دغه روغتيايي مرکز د کندهار ولایت د ډنډ ولسوالۍ په کرز کلي کې په يو جرېب ځمکه د شپږ میلیونه او څلور سوه زره افغانيو په لګښت جوړ شوی.
چارواکي وايي، د دې مرکز د جوړولو ټول مالي لګښت د قطر هېواد سرې میاشتې ټولنې له لوري ورکړل شوی او عمده موخه یې په ډنډ ولسوالۍ کې خلکو ته د کافي روغتيايي خدمتونو وړاندې کول دي.
د افغاني سرې میاشتې ټولنې مرستیال عزیزالرحمن وايي: « زموږ کلیوالي سیمې ډېرې ګڼ نفوسه دي او نه شي کولی لویو ښارونو او روغتونونو ته لاسرسی ولري. په داسې لرې پرتو سیمو کې د روغتیايي برخې تقویه کول د سرې میاشتې له لومړنیو کارونو څخه دي.»
د قطر د سرې میاشتې استازی حسین بوتاني وايي: « دا پروژه د افغاني سرې میاشتې له ټولنې سره د نږدې همکارۍ او د عامي روغتیا وزارت د محلي چارواکو په همکارۍ بشپړه شوه. موږ په ګډه د دې هڅو په داوم او روغتیايي خدماتو په لور ګامونه پورته کوو.»
د چارواکو په خبره، په دې روغتیايي مرکز کې به ناروغانو ته ټول روغتيايي خدمات په وړيا توګه وړاندې کېږي.
د تازه جوړ شوي روغتیايي مرکز یو تن ډاکټر محمد فاروق وايي: « دا یو ابتدايي کلینیک دی او کوم خدمتونه چې په لومړنیو روغتیايي مرکزونو کې وړاندې کېږي، په عمومي توګه په کې داخله ناروغۍ تشخیص او درملنه، د قابله ګۍ او نرسېنګ اړوند خدمتونه، د مور او ماشوم د خوارځواکۍ خدمتونه او دغه راز د واکسین د تطبیق خدمتونه شامل دي.»
د کندهار د عامې روغتیا ریاست معلومات ښيي، د ډنډ ولسوالۍ څه باندې ۳۵ زره اوسېدونکي به له دې روغتیايي مرکز څخه وړيا خدمتونو ته لاسرسی ولري.
ځايي اوسېدونکي د دې روغتیايي مرکز په پرانيستل کېدو خوښ دي او وايي، کندهار ښار ته د ناروغانو د لېږد مالي وس نه لري او له همدې کبله غوښتنه کوي چې روغتيايي خدمتونه باید د ولسوالۍ نورو سيمو ته هم پراخ شي.
د ډنډ ولسوالۍ اوسېدونکی عبدالباقي وايي: «دا ساحه ډېره پراخه ساحه او خلک له روغتیايي پلوه ډېرې ستونزې لري، ځکه روغتیايي مرکز او کلینیک نه و. اوس چې دا کلینیک جوړ شو، خلک به خپل ناروغان دلته راوړي، ځکه دا خلک بېوزله دي او نه شي کولی تر ښارونو پورې لاړ شي.»
د سیمې یو بل اوسېدونکی عبدالرازق وايي: «زموږ په هره ولسوالۍ او کلي کې دغه شان روغتیايي مرکزونو ته اړتیا شته، هرڅومره چې ډېر وي ښه دي، خلک به ورسره هوسا شي.»
په ولسواليو او لرې پرتو سیمو کې د روغتيايي خدمتونو وړاندې کول د خلکو له اساسي غوښتنو څخه دي. د خلکو په خبره، ډېری کورنۍ نه شي کولی د اقتصادي ستونزو له امله ښارونو ته خپل ناروغان ولېږدوي.
