په پاکستان کې یو شمېر پخواني چارواکي او برحاله سیاسیون د دې هېواد اوسنی حکومت له افغانستان سره پر ډېپلوماټیکو اړیکو رغولو او ساتلو کې ناکام بللی.
په واشنګټن او کابل کې د پاکستان پخوانیو سفیرانو ویلي، اسلام اباد له کابل سره د اړیکو پر رغولو کې پاتې راغلی او د دواړو هېوادونو ترمنځ د اړيکو ترينګلتيا له امله، پاکستان ته د متوجې سياسي او اقتصادي زيانونو له امله اندېښمن دي.
په کابل کې د پاکستان پخوانی سفیر منصور احمد خان وايي: « پاکستان باید له افغانستان سره د هند له اړیکو اندېښمن نه شي. دا دې دواړو هېوادونو د حاکیمت حق دی چې خپلې اړیکې د خپلو اصولو پر بنسټ ورغوي. د پاکستان لپاره د اړیکو پالل باید د ګاونډيتوب او خلکو ترمنځ د نږدېوالي له مخې رامنځته شي.»
د پاکستان ډان ورځپاڼې د دې هېواد د يوې پوځي سرچینې له قوله راپور ورکړی چې پوځ له یو شمېر پاکستاني سیاسونو او ګوندونو سره په ګډه ناسته کې له افغانستان سره د اړیکو رغولو لپاره د پالیسیو پر ارزونې خبرې کړې.
دا په داسې حال کې ده چې د ځينو راپورونو له مخې، د بلوچستان آزادۍ غوښتونکي غورځنګ له تېرو ۴۸ ساعتو راهیسې له پاکستاني پوځيانو یو شمېر مهمې سیمې او پوستې نیولي دي.
د سیاسي چارو کارپوهان وايي، پاکستان تل له ګاونډیو هېوادونو او په ځانګړې توګه له افغانستان سره د اړیکو په ساتلو کې له توپیري چلن کار اخیستی.
د دوی په خبره، سرپرست حکومت باید د پاکستان په ګډون ټولو ګاونډیو او د سیمې له هېوادونو سره د چلن په اړه داسې پالیسي تعقیب کړي چې ملي ګټې په کې لومړیتوب ولري.
د سیاسي چارو شنونکی فېض محمد ځلاند وايي: « پاکستان تل د افغانستان په اړه دوه رنګه منافقانه سیاست خپل کړی. د دوی نظامیان، سیاسیون او حتا ولس کې متنفذین د افغانستان په اړه شوم اهداف لري او د بدرنګو پالیسیو په پاللو سره د افغانستان په کمزورۍ کې خپلې ګټې ویني. پاکستان ته د یوه ګاونډي مسلمان هېواد په توګه په کار دي چې د افغانستان په اړه خپله پالیسي بدله کړي او افغانستان ته سیاسي، اقتصادي او ټولنیزو برخو کې د همکارۍ ډاډ ورکړي. موږ ته هم په کار ده په داخلي مشروعیت باندې کار وکړو او د پاکستان په اړه له ملي دریځ خبرې وکړو او ټول افغانان په یوه خوله د افغانستان د دوښمنانو پر وړاندې ودرېږو.»
ځینې نور بیا په دې اند دي چې اسلاماباد لوېدیځ ته د خپلې ژمنتیا ثابتولو لپاره له ځينو هېوادونو سره خپلو پالیسيو کې بدلون راوستلی.
د سیاسي چارو شنونکی عزیز معارج وايي: « پاکستان تل د خپلو ګټو پر بنسټ له افغانستان سره د هر ډول وسایلو، ابزارو، ډېپلوماسۍ او اړیکو کار اخسیتی. دوی اوس په دې فکر کوي چې د ټرمپ په راتګ سره غربي نړۍ او یا زبرځواک هېوادونه غواړي په افغانستان کې اصلاحات راولي یا مداخله وکړي او یاهم د طالبانو پر وړاندې عمل وکړي. نو دوی هم مخکې له مخکې د طالبانو له اسلامي امارت سره خپل مخالفت اعلانوي.»
د پاکستان پر بهرنیو پالیسیو او له افغانستان سره يې پر اړیکو وروسته له هغې نيوکې زياتې شوې چې د هندي او افغان چارواکو ترمنځ لیدنې تودې شوې.
له بلې خوا، څو ورځې وړاندې د هند بهرنیو چارو وزارت هم د پکتیکا په برمل ولسوالۍ کې پر عامو خلکو د پاکستان هوايي بمبارۍ وغندلې.
