د ریاست الوزرا اقتصادي مرستیال ملا عبدالغني برادر اخوند پر مشرۍ ملي تدارکاتو کمېسیون د شاوخوا ۳ میلیارده افغانیو په ارزښت ۱۷ پروژې منظورې او د ۹ نورو یې تړونونه تعدیل کړل.
چارواکي وایي، په منظور شویو او هغو پروژو کې چې قراردادونه يې تعديل شوي، د کابل د ارغندۍ ټرانسپورټي ترمینل جوړول، د هرات په ګذرې ولسوالۍ کې د باروړونکو موټرو لپاره تم ځای جوړول، د آقینې، اندخوی او تورغونډۍ بندرونو ترمنځ د اوسپنې پټلۍ پروژو ترمیم، په کندهار، هلمند او فراه کې د نوري فایبر لینونو غځول شامل دي.
د اسلامي امارت د ویاند مرستیال حمدالله فطرت وايي: « د ریاست الوزرا اقتصادي مرستیال محترم ملا عبدالغني برادر اخوند پر مشرۍ د ملي تدارکاتو کمېسیون د شاوخوا ۳ میلیارده افغانیو په ارزښت د ۱۷ پروژو قراردادونه منظور کړل او د ۹ نورو یې تعدیل کړي دي. د ملي تدارکاتو کمېسیون نوبتي غونډې ته له اجنډا سره سم ۳۲ پروژې د بحث لپاره وړاندې شوې وې چې له ډلې یې د ۱۷ پروژو قراردادونه منظور شول.»
فطرت وايي، په دغو پروژو کې د کابل ښار د یو شمېر داخلي سړکونو اساسي جوړول، په بېلا بېلو ولایتونو کې د برېښنا اړوند پروژو د پاتې چارو بشپړول هم شامل دي چې په خبره يې د ملي بوديجې له لارې به تمویل شي.
فطرت په دې اړه وايي: « د کابل ښار د یو شمېر داخلي سړکونو اساسي جوړول، په بېلابېلو ولایتونو کې د برېښنا په برخه کې د شته پروژو د پاتې چارو بشپړول او یو شمېر نورې پروژې شاملې دي چې اسلامي امارت به یې تمویلوي.»
د اقتصادي چارو کارپوهان د يادو پروژو تطبیق د اقتصادي ودې لپاره مهم بولي او له سرپرست حکومت غوښتنه کوي چې په ټولو ولایتونو کې د کارموندنې په موخه نورې زيربنايي پروژې هم پلې کړي.
د اقتصادي چارو کارپوه عبدالنصیر رشتیا وايي: « د بندونو جوړول ډېرې مهمې او حیاتي پروژې دي. سره له دې چې خلکو ته د کار زمینه برابروي، د خلکو د رفاه سبب کېږي، هېواد ته د آبادۍ او بیا رغونې په لوري حرکت ورکوي.»
د اقتصادي چارو کارپوه عبدالجبار ساپی وايي: « دغسې پروژې چې د افغانستان لپاره زېربنايي او بنیادي پروژې دي، په اقتصادي او اجتماعي برخه او د فقر له منځه وړلو کې ډېرې مهمې دي.»
په ورته مهال، اقتصاد وزارت د ملي تدارکاتو کمېسیون له خوا د ۱۷ پروژو منظورېدل د اقتصادي او ټولنیز پرمختګ لپاره بنسټېزه اړتیا او اغېزناکې بولي.
د اقتصاد وزارت ویاند عبدالرحمن حبیب وايي: « د ریاست الوزا اقتصادي مرستیالۍ له خوا د شاوخوا ۳ میلیارده افغانیو په ارزښت د ۱۷ منظور شویو او ۹ تعدیل شویو پروژو د چارو پيل کېدل چې د کورنیو عوایدو او پراختیايي بودیجې له لارې تمویلېږي، د زېربنايي جوړښتونو لکه سړکونو، رېل پټلۍ، برېښنا، مخابراتو، ټکنالوژۍ او نورو برخو کې د هېواد اقتصادي او ټولنیز پرمختګ لپاره بنسټيزې اړتیاوې برابروي او د اوږدمهاله اقتصادي پرمختګ او دغه راز د ټولنې د رفاه لپاره خورا مهمې اغېزې درلودای شي.»
د ریاست الوزرا د اقتصادي معاونیت د مالوماتو له مخې، د کاسا زر، ټاپي او ټاپ پروژو عملي کېدل به پر اقتصادي پراختیا سربېره، افغانستان ته د ټرانزیټ له درکه هر کال د پام وړ عواید ولري.
