Skip to content
طالبانو د دوشنبې په ورځ د زور له لارې پنجشېر ونيو،چې د يو شمېر ګاونډیو هېوادونو غبرګونونه يې هم راوپارل.
د اسلامي امارت مسوولين وايي، هلته اوس امن دی او د ژوند ډېرې چارې بېرته په کې عادي شوي.
د اسلامي امارت د مطبوعاتو برخې غړی بلال کریمي وايي:«هلته وضعيت کنترول دی، مجاهدين په ټول ځواک سره په پنجشېر ولايت کې دي. هېڅ ستونزه نه شته دی. د جګړې خبرونه شايعات دي.»
خو د ملي مقاومت په نوم جبهه وايي، مهمې او لوړې مورچلې يې په لاس کې دي او د طالبانو تر شړلو به خپلې مبارزې ته دوام ورکوي.
له پنجشېره ځينې راپورونه وايي، هلته خلکو ته زيان اوښتی او بايد دغه مسله د خبرو اترو له لارې حل شوې وای، هغه څه چې دواړه خواوې يو بل ملامتوي.
د سیاسي چارو شنونکی ويس ناصري وايي: «ښايي اوس د سيمې او ځينو هېوادونو پلان دا وي چې طالبان د افغانستان په ټوله جغرافيه واکمن شي، خو د پنجشېر مقاومت حتما يوه نتيجه لري.»
په پنجشېر کې د طالبانو ضد جبهې مشري امرالله صالح، احمد مسعود، او د مخکيني حکومت دفاع وزير او يو شمېر نور پخواني قوماندانان کوي چې پر ملاتړ یې سلګونه کسان راټول شوي دي.
ډاکټر عبدالله عبدالله بیا په پنجشیر کې په وروستۍ جګړې ژوره خواشیني څرګنده کړې ده.
عبدالله زیاته کړې: «په پنجشیر کې چې څه تېر شول،خورا دردونکې وو، د هېواد رشيد او زړور بچي په کې له منځه لاړل.»
د پنجشېر د وضعيت په اړه خپلواکو سرچينو کره مالومات نه دي شريک کړي، طالبان هلته د ډاډمن وضعيت او د مقاومت جبهه د مورچلو ساتلو خبره کوي او تازه یې ادعا کړې چې د سه شنبې په شپه یې ځينې سیمې بېرته نیولې دي.
