په کندهار ولایت کې که څه هم په کتابتونونو کې د کتابونو کمی نه شته، خو د لوستونکو شمېر تر پخوا ډېر پيکه شوی دی.
کندهار ښار کې کتاب پلورونکي وايي، په دې وروستیو کې يې د کتابونو په پلور کې د پام وړ کموالی راغلی او تر پخوا يې کاروبار ډېر کم شوی.
دوی زیاتوي، ځینې خلک د کتابونو پېرلو پر ځای اړ شوي چې خپل شخصي کتابونه د پلور لپاره بازار ته وړاندې کړي.
کتاب پلورونکی منظور احمد وايي: «په دې وروستیو کې د کتابونو پلور ډېر کم شوی او داسې ډېر پېښ شوي چې ځینې ځوانان راغلي او خپل کتابونه یې راوړي ترڅو موږ یې ورته وپلورو. خو موږ ورته وایو چې له موږ سره خپل ډېر کتابونه پراته دي او څوک یې نه اخلي.»
یو بل کتاب پلورونکی قدرتالله کریمي وايي: « د اطلاعاتو او فرهنګ ریاست باید داسې کار وکړي چې ځوانان کتاب لوستلو ته وهڅوي. دوی باید غونډې جوړې کړي یا د مثال په توګه نندارتونونه جوړ کړي او خلکو ته د مطالعې کولو روحیه ورکړي.»
په ورته وخت کې، د کندهار فرهنګیان او کتاب دوستان وايي، د خلکو له خوا د کتاب نه لوستل د یوې ټولنې د وروسته پاتې کېدو لامل ګرځي او بدې پایلې لري.
کندهار کې د پوهنتون استاد نیاز محمد په دې اړ وایي، ځوانانو ته د کورنیو نه پاملرنه، د ټولنیزو رسنیو زیات کارېدل، د کتاب لوستنې فرهنګ نه ترویجول او نور ډېر هغه لاملونو دي چې ټولنه د بې سوادۍ او د کتاب لوستنې فرهنګ پیکه کېدو خوا ته بیایي.
استاد نیازمحمد زیاتوي:« د مطالعې د کمېدو یو لامل د ټولنیزو رسنیو خورا زیات او غیر هدفمند استعمال دی. ځوانان خپل ډېر وخت په ټولنیزو رسنیو او د ځیرکو مبایلونو په کتلو تېروي. دا کار د دې لامل کېږي چې دوی له کتاب لرې پاتې شي. په عمومي توګه اړینه دا ده چې هم کورنۍ او هم فرهنګي، علمي او کولتوري ادارې د مطالعې د فرهنګ عامولو لپاره پروګرامونه جوړ کړي.»
له بلې خوا، د اطلاعاتو او فرهنګ وزارت مسولین وايي، دوی د مطالعې دود رواجولو او کتابونو پلورولو په برخه کې زیاتې هڅې کړې او غواړي راتلونکي کې دغه برخه نوره هم پیاوړې کړي.
د اطلاعاتو او فرهنګ وزارت ویاند حبیب غفران وايي: « د کتابونو د بازار او پېر او پلور په تړاو باید ووایم چې هلته په کندهار کې د اطلاعاتو او فرهنګ ریاست له خوا تل هڅه شوې چې د کتاب خرڅوونکو او ناشرانو لپاره بازار موندنه وکړي. د هغوی له ټولنې سره په همغږۍ د کتابونو په صادراتو او وارداتو کې همکاري کېږي او داسې نندارتونونه په لاره اچول کېږي چې څنګه کېدای شي د کتاب مطالعه په هېواد کې دود شي او دغې برخې ته د خلکو پام واړول شي.»
د کندهار اطلاعاتو او فرهنګ ریاست له خوا څو میاشتې وړاندې د مطالعې دود رواجولو او کتاب پلورولو په موخه یو لوی نندارتون هم جوړ کړی و چې پر مهال یې زیات شمېر کتابونه وپلورل شول، له همدې امله کتاب پلورنکي د دغه ډول نندارتونونو د زیاتېدو غوښتنه کوي.
