د ننګرهار ولايت په تورخم ښارګوټي کې له درې کلن ځنډ وروسته د معياري وزن لېږد په موخه تله يو ځل بيا فعاله شوه، چې پر مټ به يې د فساد مخنيوی تر څنګ سړک هم خوندي وساتل شي.
د ننګرهار ټولګټو چارو رئیس مولوي يار محمد وايي، د تېر حکومت مسئولينو له دريو کالونو راهیسې دا تله تړلې وه، چې له امله يې مالي فساد ترڅنګ د زيات وزن وړلو له امله سړکونه هم زيانمن شوي و.
هغه وايي، له هر بار وړونکي موټر څخه له سلو تر ۲۰۰ افغانيو پورې اخیستل کېږي او هېچا ته له ټاکلي وزنه د زيات وزن وړلو اجازه نه ورکول کېږي.
له بل لوري، موټر چلوونکي د اسلامي امارت د دې نېک اقدام هر کلی کوي او وايي، چې تېر حکومت کې تله تړل شوې وه او له هر بار وړونکي موټر څخه د وزن پوښتنه نه کېده او تر ديرش زرو افغانيو پورې غير قانوني پیسې ترې اخيستل کېدې.
دوی خوښي څرګنده کړه، چې د فساد مخنیوی وشو او د سړکونو خونديتوب په موخه به له دې وروسته معياري وزن ولېږدول شي.
