د امریکا متحده ایالتو د سنا مجلس د بهرنیو چارو کمیټې مسوول مایکل مک کول وايي، طالبانو یې په بلخ ولایت کې الوتکو ته د الوت اجازه نه ده ورکړې.
مک کول وايي، دوی غوښتل چې د مزار شریف هوايي ډګر له لارې خپل امریکايي اتباع او ژباړونکي راوباسي، خو د طالبانو له لوري برمته کړای شوي دي.
مک کول ادعا کړې ده چې طالبانو دغه کسان د یو لړ غوښتنو په بدل کې برمته کړي دي.
مک کول زیاتوي: «زه ګومان کوم چې د اګسټ له ۳۱مې وروسته موږ هېڅوک نه دي راوستلي، ځکه زموږ ۶ الوتکو غوښتل چې د مزارشریف هوايي ډګر له لارې بهر ته ولاړ شي، خو طالبانو یې د الوت مخه نیولې ده. په دغو الوتکو کې امریکايي اتباع او د امریکايي پوځ ژباړونکي ول. زما په اند هغوی دغه الوتکې برمته کړي او په بدل کې به یې څه غواړي.»
اخوا د جرمني لومړۍ وزیره انګېلا مېرکل بیا وايي، اوس اړ دي چې د خپلو اتباعو د اېستلو په تړاو مستقیم له طالبانو سره خبرو ته کیني.
مېرکل زیاتوي: «اوس چې طالبان د هرڅه مسوول دي. موږ اړ یو چې له طالبانو سره مستقیمې خبرې وکړو او د خپلو خلکو د اېستلو خبرې ورته وکړو. اوس هلته بل داسې ادرس نه شته، چې سړی ورسره خبرې وکړي. موږ په جدي توګه هڅه کوو چې د جرمني اتباع له دغه هېواده وباسو.»
طالبان دغه ادعا نه ردوي او نه یې تائیدوي، خو زیاتوي چې په دې تړاو یې څیړنې دوام لري، چې هلته څه پیښ شوي دي.
خو د مزار شریف هوايي ډګر مسوولین وايي، دغو مسافرو ته یې ځکه اجازه نه ده ورکړې،چ ې ویزه او نور اسناد یې نه درلودل.
دا په داسې حال کې ده چې د امریکايي ځواکونو او طالبانو ترمنځ د تخلیې په برخه کې دا شرط نه و ذکر شوی، چې د اېستل کیدوونکو کسانو سره باید اسناد موجود وي.