د اسلامي امارت ویاند ذبیح الله مجاهد نن دوشبنه د « ۱۴۰۰کال د وږي پر ۱۵ مه» کابل کې د یوه خبري کنفرانس پر مهال وویل، د پنجشیر ولایت چارواکو سره یې مذاکراتو پایله ورنه کړه او له خبرو وروسته اړ شول چې د جګړې له لارې یاد ولایت ته داخل شي.
مجاهد وایي، پنجشیر کې یې زیاد شمیر لرې واټن ویشتونکې،سپکې او درنې وسلې نیولي دي.
دغه راز هغه وايي، دوی ته راپورونه رسیدلي چې امرالله صالح تاجکستان هېواد ته وتلی او نور کسان یې له پنجشیر تښتېدلي دي.
مجاهد زیاتوي: «موږ ته چې ورستي او ناتائید شوي راپورنه رارسیدلي، امرالله صالح تاجکستان هېواد ته تښتیدلی او نور کسان یې هم پنجشیر کې نه شته او نادرکه دي.»
طالبانو او پنجشیر کې د مقاومت جبهې پنځه ورځو نښتو کې یو بل ته د درنو تلفاتو اړولو ادعاوې کولې، خو چارواکو د اوښتې مرګ ژوبلې په تړاو معلومات ورنه کړل.
مجاهد د پنجشیر جبهې د ویاند فهیم دشتي د وژلو په تړاو وویل، هغه د دوی له لوري نه دی وژل شوی .
پنجشیر کې د طالبانو ضد جبهې مشر احمد مسعود په یوه پیغام کې د اسلامي امارت پر ضد د ولسي قیام غوښتنه کړې او ټینګار یې کړی چې مقاومت ته دوام ورکوي.
اخوا د سیاسي چارو یو شمېر شنونکي بیا وايي، د پنجشیر نیول د هېواد او سیمې د امنیت لپاره اړین وه.
د سیاسي چارو شنونکی ذاکر جلالي وايي: «زه فکر کوم طالبانو هم نهایي هڅه وکړه، چې ژر تر ژره د پنجشیر ستونزه حل کړي، تر څو اوږدې جګړې او د بلې کورنۍ جګړې ټول امکانات له منځه ویسي او ټول افغانستان په امن او سوله کې یو موټی او یو ځای شي. تر څو د نوي حکومت اعلان سره یو ډول ننګونې موجودې نه وي .»
اسلامي امارت د کابل په ګډون د هېواد ۳۳ ولایتونه ترخپل حاکمیت راوستي و، خو پنجشیر هغه یو ولایت وه چې طالبان یې درې اوونۍ وروسته په بشپړ ډول نیولو بریالي شول.