Skip to content
د افغانستان اسلامي امارت ویاند ذبیح الله مجاهد نن دوشنبه د «۱۴۰۰کال د وږي پر ۱۵ مه» رسنیو مرکز کې خبریالانو ته وویل، د بشري احساس له مخې، د نړیوالو مرستو څخه هرکلی کوي،خو په خبره یې که د حکومت د څرنګوالي پر شرط بهرنیان مرستې کوي،دوی یې نه مني.
نوموړي ټینګار وکړ،چې د افغانستان راتلونکی حکومت به له هر ډول بهرنۍ لاسوهنې ازاد وي او افغانان به د خپلې خوښې پرېکړې کوي.
مجاهد د پنجشیر وضعیت ته په اشارې وویل، هلته یو شمیر کسان وو،چې جنګ ته یې لمن وهله،خو که اوس هم عادي ژوند ته راوګرځي،دوی ور سره مشکل نه لري.
مجاهد د پنجشیر خلکو ته ډاډ ورکړ،چې له هغوی سره به هېڅ ډول توپيري چلند نه کېږي.
نوموړي زیاته کړې،ټول یې ورونه دي او د یوه هېواد او یوه هدف لپاره به مشترک خدمت کوي.
طالب ویاند دا هم وویل،په هغو راپورونو کار کوي،چې ویل کېږي امرالله صالح له افغانستان وتلی دی.
مجاهد وویل، د ملي اردو، پولیسو او استخباراتو له کار کوونکو سره به یو ځای پر ګډه کار وکړي او د هغوی له وړتیاوو به ګټه واخلي.
په ورته وخت کې هغه وايي، پنجشیر کې نیول شوې درندې وسلې به د هېواد په سلا کوټونو کې ځای پر ځای او د خاورې د ساتنې لپاره به ترې کار واخېستل شي.
مجاهد د مقاومت جبهې ویاند فهیم دشتي د وژل کیدو په تړاو وویل، دشتي د پنجشیریانو خپل منځي نښتې پر مهال وژل شوی دی.
د مجاهد په خبره فهیم دشتي د قوماندان جرات او ګل حیدر ترمنځ د شخړې حل ته ورغلی و، چې د هغوی په خپل منځي نښته کې ووژل شو.
فهیم دشتي پخوانی ژورنالیست، سیاسي کارپوه،د څه مودې لپاره د افغانستان د ژورنالیستانو د ټولنې مشر او اوس یې د طالبانو پر ضد د جوړې شوې مقاومت جبهې ویاندویي کوله.
