د کډوالو او بېرته راستنېدونکو چارو وزارت سرپرست خلیل الرحمن حقاني له شهادت وروسته د بهرنيو رسنيو له لوري داسې راپورونه خپاره شول چې په کې د حکومتي چارواکو ترمنځ د اختلافاتو زياتېدو ادعا شوې.
خو د رياست الوزرا اقتصادي مرستيال ملا عبدالغني برادر اخوند د يادو راپورونو ادعاوې ګنګوسې بولي او د ردولو ترڅنګ يې وايي، په سرپرست حکومت کې دننه هېڅ راز اختلاف نه شته.
اخوند دا څرګندونې د شنبې په ورځ په پکتيا کې د خليل الرحمن حقاني د فاتحې په مراسمو کې وکړې او ډاډ يې وښود چې ټولې حکومتي چارې په متحدانه توګه ترسره کېږي.
هغه زیاته کړې: « موږ به انشاالله کوم څه چې دنیا وايي، هغه باید هېڅوک خپل دماغ ته پرېنږدي. په خدای مې دې قسم وي، ما بل وخت هم دا خبره کړې ده، چې یو مشر وینم ډېر خوشاله کېږم. د دې مانا لري چې زموږ د مشرانو په منځ کې مینه او محبت شته. مه د چا خبرو ته غوږ نیسئ او مه پرې سوچ خرابوئ.»
د سیاسي چارو کارپوهان که څه هم اختلافات د سرپرست حکومت د مخالفو اړخونو تبلیغاتي هڅې بولي، خو پر دې هم ټينګار کوي چې سرپرست حکومت دې د ورته هڅو شنډولو لپاره د ولس غوښتنې ومني.
د سیاسي چارو کارپوه محمد سلیم پیګیر وايي: « د افغانستان اسلامي امارت د رهبرۍ ترمنځ هغه اختلافونه موجود نه دي چې ډلې ټپلې، افراد او هېوادونه یې په اړه تبلیغ کوي. دا خلک غواړي د خپلو هېوادونو، اشخاصو او ډلو د ګټو لپاره، داسې پروپاګند سازماندهي کړي او تبلیغات وکړي، ترڅو ګټه ترې واخلي.»
د سياسي چارو کارپوه روحالله هوتک وايي: « د افغانستان د اوسني زعامت تر لېوا لاندې د ټولو چارو ترسره کېدل، د فرامینو تطبیق او بالاخره د ټولو خواوو په برخه کې کوم اقدامات چې ترسره شوي او یا هم د اطاعت کوم څرک لیدل کېږي، دا په دې دلالت نه کوي چې د دوی او د چارواکو ترمنځ د اختلاف موجود وي.»
ځينې نور بیا د يوه داسې مکانېزم پر رامنځته کولو ټينګار کوي چې په نتيجه کې يې د اختلافاتو مخه نيول شوې وي او برعکس په حکومتي او ولسي کچه يووالي ټينګ شي.
د نړیوالو اړیکو کارپوه نجیبالرحمن شمال وايي: « د دې لپاره چې د نفاق او شقاق د شتون له امله د افغان قومونو ترمنځ له دې ډېر د تلفاتو او خساراتو سبب نه شي.»
له دې یوه میاشت وړاندې د بهرنیو چارو وزارت سیاسي معین شېر محمد عباس ستانکزي د چارواکو ترمنځ د اختلافونو موجوديت رد کړی و.
