د بهرنیوچارو وزارت سیاسي معین شېرمحمد عباس ستانکزي چې د نوي کابل ښار د لومړي فاز د یوې برخې کار پیل کېدو په پرانیستغونډه کې يې خبرې کولې وویل، په سوریه کې د بشارالاسد کورنۍ حکومت چې د ظلم او زور نظام و او نیمه پیړۍ یې دوام درلود، بالاخره نسکور شو.
ستانکزي زیاته کړه، هېڅ ځای کې د زور او ظلم حکومتونه دوام نه کوي او برخلیک به یې د ظالمو حکومتونو په څېر نسکورېدل وي.
د ستانکزي په خبره، د افغانستان نظام باید داسې مخ ته لاړ شي چې د افغانستان راتلونکي نسلونه یې په ویاړ سره یاد کړي.
ستانکزی زیاتوي:« د فشار او د زور حکومتونو نتیجه به همدغسې وي او آخر به زوال مومي. داسې به زوال مومي چې تاریخ به یې په بد نوم یادوي. خو د عدل حکومتونه، شرعي حکومتونه او د خلکو په زړه حکومتونه به تل په تاریخ په طلايي کرښو لیکل کېږي. نو، راځئ چې د خپل نظام او حکومت د افغانستان په آینده تاریخ کې داسې ولیکو چې راتلونکی نسل موږ ته دعاوې وکړي، پر موږ افتخار وکړي او موږ داسې یو څه ورته پرېږدو چې دا وطن پر خپلو پښو ولاړ وي.»
ستانکزی وايي، هغه مخالفین یې چې په پوځي برخه کې مات شوي، اوس له افغانستان سره په سیاسي، اقتصادي او استخباراتي برخو کې جګړه کوي.
ستانکزي زیاته کړه: « موږ هغه دوښمنان چې پرون یې په نظامي ډګر کې ماتې وخوړه، تاسو وینئ چې نن له موږ سره په سیاسي، اقتصادي او استخباراتي ډګر کې په جګړه بوخت دي.»
د بهرنیو چارو وزارت سیاسي معین د افغانستان د اوسني نظام پر ساتلو ټینګار وکړ او ویې ویل، د چارواکو ترڅنګ ولس هم مکلف دی چې د نظام په ساتنه کې ونډه واخلي.
هغه په دې اړه وايي: « د اقتصادي کارونو ترڅنګ پر موږ لازمه ده چې دا نظام هم وساتو او د نظام ساتلو لپاره د هرچا دنده ده چې خپله ونډه واخلي. دا یوازې د حکومت او مشرانو دنده نه ده بلکې د دې ملت هر فرد مسوولیت لري او باید په ساتلو کې یې خپله فریضه اداء کړي.»
د عباس ستانکزي په خبره، له شک پرته د افغانستان حکومت په اقتصادي برخه کې پرمختګ کړی او لاسته راوړنې لري؛ خو اړتیا ده هغه افغان پانګوال چې په بهرنیو هېوادونو کې مېشت دي، خپل هېواد ته راستانه کړي ترڅو دلته پانګونه وکړي.
