Skip to content
په پلازمېنه کابل کې د طالبانو د راتګ شااوخوا شل ورځې تېرېږي،خو لا هم ډېری بانکونو فعالیت نه دی پيل کړی.
کابل ښار کې د ځینو محدودو خصوصي بانکونو د بیا فعالیت سره ګڼ ښاریان او ان له ولایتونو څخه خلک راغلي،ترڅو خپلې پيسې ترلاسه کړي.
دلته راټول شویو کسانو ساعتونه انتظار اېستلی، خو ځنې پيسې ترلاسه کوي او ځنې د ګڼې ګوڼې او وخت کمښت له امله پيسې نه شي ترلاسه کولی.
د کابل ښار یو تن اوسېدونکی وايي:« موږ د خپلو پېسو لپاره ساعتونه ساعتونه انتظار کوو. دلته کتار کې ولاړ يو،خو کله به نوبت راځي.»
د کابل ښار یو تن اوسېدونکی وايي:«زه له ليرې ځای څخه راغلی يم. زموږ ساحه کې بانکونه بند دي. اسلامي امارت بايد بانکونه په بشپړه توګه خلاص کړي.»
د بانکونو اتومات ماشينونه زياتره غير فعال او خلک د خپلو پېسو لپاره سخت کړاونه وباسي.
ډېری کسان وايي، جېب کې يې پېسې خلاصې دي او بانکونو کې يې شته پانګه اېستل ورته په يوې ستونزه بدل شوي،خو د دې هرڅه سربېره د دې اوونۍ په پېل کې زيات بانکونه د خلکو پرمخ خلاص وو.
د کابل ښار یو تن اوسېدونکی وايي:«بانکونه باید د صرافيو اتومات ماشينونه هم خلاص کړي،ځکه دلته نوبت کې زيات وخت تېريږي،ساعتونه ساعتونه خلک ورته ولاړ دي.»
د کابل ښار یو تن اوسېدونکی وايي:«کور کې مې چې څه پېسې وې،هغه ختمې شوې اوس پېسې نلرم.غواړم له بانک څخه يې واخلم،خو پر بانکونو باندې زیاته ګڼه ګوڼه ده.»
اسلامي امارت د تېرې سه شنبې په ورځ د بانکونو د خلاصولو ويلي وو،خو لا هم بانکونه په بشپړه توګه خلکو ته خدمات نه وړاندې کوي او د خلکو پېسې بند دي،چې له ډېری کسانو سره د لومړنيو توکو د اخېستو ذخېره هم ختمه ده.
د افغانستان د مرکزي بانک د پرېکړې له مخې،د خصوصي بانکونونو پېرېدونکي په اوونۍ کې یوازې تر ۲۰ زره افغانیو د راېستلو حق لري او له دوه سوو زیات ډالر نه شي راېستلی.
