Skip to content
د ختیځ ننګرهار ولایت یو شمېر اوسېدونکي شکایت کوي،چې د خوراکي او غیر خوراکي توکو بیې خورا لوړې شوي او د رانیولو توان یې نه لري، ځکه وروستیو ناخوالو له اقتصادي اړخه سخت ځپلي دي.
دوی وايي، له مسولینو غوښتنه غواړي،چې ژر دې د توکو نرخونه کنترول کړي.
دوی زیاتوي،چې،په تېرو درې اونیو کې بې کارۍ ورسره شته امکانات ختم کړي اوس باید ورته نوی دولت د کار کولو زمینه برابره کړي، تر څو لوږه او د پېسو نه شتون یې ژوند ونه ګواښي.
د جلال اباد ښار یو تن اوسېدونکی وايي:« وړاندې ډېری کسانو دندې لرلې، خو اوس دندې نه لري. له دوی سره،چې کومې پيسې وې،هغه په خلاصېدو دي، نو خلک له ډېر ستر بحران سره مخ دي. له اسلامي امارته مو غوښتنه دا ده،چې خلکو ته د کار زمېنه برابره کړي. »
یو شمېر ښاریان وايي،څومره ژر چې کېدی شي،د طالبانو اسلامي امارت دې ټولې چارې عادي کړي،تر څو خلک له هغو ستونزو را ووځي،چې اوس ورسره لاس او ګرېوان دي.
د جلال اباد ښار یو تن اوسېدونکی وايي:« اسلامي امارت باید خلکو ته د کار زمینه برابره کړي. دلته عام خلک ډېر غریب دي، ان څوک چې سوال کوي، اوس پیسې نه ورکول کېږي. ټول په خپله وېره کې دي.»
ځينې بیا وایي، له ښاره په لېرو پرتو سېمو کې بیا د خوراکي توکو له نه شتون سره مخ دي او پر مسولینو غږ کوي،چې په دې برخه کې جدي ګامونه پورته کړي.
د جلال اباد ښار یو تن اوسېدونکی وايي:«د افغانستان له اسلامي امارته مو غوښتنه دا ده،چې بېرته ژر تر ژره چارې عادي کړي. د ښار نظم،نرخونه، تجارت او همدارنګه د ښار امنیت ته جدي پاملرنه وکړي. »
د طالبانو د اسلامي امارت د یو شمېر توکو نرخونه ټاکلي او د کار په برخه کې یې ولسونو ته ډاډ ورکړی دی، خو بیا هم د وږو تر بیګاه صبر نه کېږي.
وروسته له هغې،چې طالبانو پر هېواد ولکه ټینګه کړې، په لویو ښارونو کې د خوراکي او سون توکو نرخونه له بل هر وخت ډېر لوړ شوي دي.
