د سیاسي چارو شنونکي په دې باور دي،چې اقتصادي فشارونه به طالبانو ته يوه ستونزه وي، په داسې حال کې چې د دوی حکومت نوی او له خپلو منابعو يې ګټه اخېستل لا نه دي پېل کړي.
د سیاسي چارو شنونکی امان الله هوتکي وايي:« طالبان دې نړیوالو قوانینو او د اروپايي ټولنې قوانینو ته غاړه کېږدي او دا ډېره اړېنه ده. که څېرې طالبان دې قوانینو ته غاړه کې نږدي، نو د امریکا او نورو غربي نړۍ فشارونه به پر طالبانو نور هم زیات شي.»
سره له دې چې ځينې اسيايي هېوادونو په بېلابېلو برخو کې د بشردوستانه مرستو ژمنې کړي،خو دا مرستې ځکه بسنه نه کوي،چې ورستيو دوو کالونو کې د افغانانو اقتصاد کورونا وبا او اوس بې کارۍ ځپلی دی.
بل خوا پر طالبانو غږ دی،چې د امريکا او ملګرو هغو غوښتنو ته دې په هرقېمت غاړه نږدي،چې د افغانستان د ځان بساينې او پرمختګ مخه نيسي.
د سیاسي چارو شنونکی ډاکټر عبدالروف جهاديار وايي:« زه د اسلامي امارت پر کارکوونکو او مجاهدینو غږ کوم،داسې فشارونو ته تسلیم نه شئ، ورخظا نه شئ او تر تاثیر لاندې رانه شئ.»
اسلامي امارت افغانستان کې تازه واک ته رسېدلی،خلک ورته له دې نظره خوښ دي،چې له غلو په امن دي او جنګونه پای ته رسېدلي،خو ډېری یې د اقتصادي ستونزو له کبله بیا اندېښنه لري.