Skip to content
په کابل کې د جمعې پر ورځ د « ۱۴۰۰ کال د وږي پر ۱۲ مه» یو شمېر فعالې ښځې د اریانا څلور لارې سره راغونډې شوې وې او د خپلو حقونو غوښتنه یې وکړه.
دوی خپل غږ تر نړیوالو رسوي او وايي،د طالبانو حکومت کې دې دوی ته په لوړو پوستونو کې دندې ورکړل شي.
د ښځو یوه فعاله وايي:« دا ډېره د خواشېنۍ خبره ده،هغه ښځې،چې په تېرو ۲۰ کالونو کې یې هڅې کړي،تخصص یې اخېستی، له پامه وغورځول شي. »
یو شمیر نورې بیا وایي، طالبانو خپلې کړې هغه ژمنې ماتې کړي،چې په پیل کې ویل، د ښځو له کار سره دوی ستونزه نه لري او د تېر په څېر به خپلو کارونو ته دوام ورکوي.
د ښځو یوه فعاله وايي:« دا چې موږ له اساسي قانون څخه لري شوي یو. له کابینې لري شوي یو، نو نن د دې لپاره عدالت غوښتنه کوو. د افغانستان اسلامي امارت له دولته مو غوښتنه دا ده،چې عدالت غوښتنې ته مو رسېدنه وکړي او پرېنږدي،چې ښځې له هېواده کډوالې شي.»
یوه ویډیو، چې په خواله رسنیو کې لاس په لاس کېده، د لاریون پر مهال دغو ښځو غوښتل، چې د یو شمیر دولتي ادارو مخکې شعارونه ورکړي،خو د طالبانو له غبرګون سره مخ شوي او د شعارونو پاڼې ورنه اخېستل شوي.
که څه هم طالبان وایي چې ښځو ته د کار کولو اجازه ورکوي خو لاهم د دولتي ادارو ښځینه کارکونکو ته خبر ورکړل شوی چې تر امر ثاني دې دندو ته نه راځي، هغه څه چې ښځې یې نارامه او اندېښمنې کړي دي.
دوی د عباس ستانکزي هغو څرګندونو هم غصه کړي،چې ویلي یې ول، ښځې به د کابینې، پارلمان او لوړو پوستونو په څوکیو ونه ګمارل شي.
