سید اکبر اغا وايي: «امریکایانو د راتلونکي لپاره اقتصادي جنګ شروع کړی دی. افغانانو سره هغه دا دی چې له دېخوا یې ۱۲۳۰۰۰ کسان یوړول او دا دې لپاره چې زموږ حکومت تر غیر مشروعیت لاندې راولي.»
سید اکبر اغا له خلکو غوښتنه وکړه چې د اسلامي امارت ملاتړ دې وکړي او له امارت یې وغوښتل چې خلکو ته دې ډاډمنه فضاء برابره او د ژوند اسانتیاوې دې رامنځته کړي.
سید اکبر اغا وايي: «چینایان به درسره وي، د اسیا نور ملکونه او ځینې نور هم او دا به وګورئ چې امریکایان چې نن له افغانستانه لاړل په خپل حال به پاتې نه شي، ځکه د دې شهیدانو وینو چې د روس په وخت کې رنګ راوړ او روسان یې ټوک ټوک کړل، نو امریکا به هم داسې شي.»
د غونډې ناستې ګډونوالو پر یوه غږ له طالبانو ملاتړ اعلان کړ او زیاته یې کړه چې له راتلونکي نظام او حکومت نه به د سر پر بیه دفاع او ساتنه کوي.
د مصلحت ټولنې مشر احمد میرویس اوریا وايي: «وحدت د خاورې راته بېرته همدې طالبانو وساته، کنه افغانستان له تجزیې سره مخامخ و. افغانستان به اوس تکه تکه و، که تېر ځل دا خلک نه و راپاڅېدلي او وحدت د خاورې یې راته نه و ساتلی.»
ډاکتر عبدالشکور وايي: «دلته په اسلامي نظام کې ټول ځان په ایینه کې کتلی شي، هغه نور قوانین دي چې په هغو کې بیا قومیت ده، یو ته به یوه څوکۍ او بل ته بله ورکوي چې هغه که اهل وي یا نا اهل.»
دلته راغلو کسانو د امریکا هغه عمل هم د کرکې وړ وباله چې په کابل هوایي ډګر کې یې چورلکې، رادار سیستم او د یاد ډګر نورې برخې ویجاړې کړي دي.
