له ترکیې، پاکستان او قطر هېوادونو پرته ګڼ شمیر هېوادونو تر اوسه پورې د طالبانو حکومت د رسمیت پيژندلو په تړاو خپله پریکړه نده وروستۍ کړې.
اروپايي ټولنې د طالبانو مخکینی انځور ښه نه دی بللې او وايي، اوس د افغانستان و ضعیت او د طالبانو کړنې څاري او له ارزونې پرته پریکړه نه شي کولای.
د اروپايي کمیسیون کورنیو چارو مسووله یلوا جانسن وايي: «هغوی چې موږ په تېر وخت کې لیدلي وو، خلکو ته به یې ستونزې جوړلې، د ښځو حقونه یې نه مراعت کول. د چا خبره یې نه منله او تاوتریخوالی یې کاوه، خو اوس له وخت وړاندې څه نه شو ویلی او باید ارزونه وکړو.»
چین یوازې طالبانو سره د ښو او دوستانه اړیکو پاللو خبره کړې او افغانستان یې خپل نږدې ملګری هېواد بللی دی.
د چین د بهرنیو چارو وزارت ویاند وانګ وېنبین وايي: «چین او افغانستان ډېر ښه ملګري دي، چین نه غواړي چې افغانستان زیانمن شي او همدا راز افغانستان هم د چین لپاره دا نظر لري. دواړه هېوادونه د یو بل لپاره ډېر ښه نیت لري.»
د اسراييل د بهرنیو چارو وزیر بیا ویلي، تر اوسه نه دی پوه شوی چې امریکا ولې افغانستان پرېښود، ځکه هلته د ایران په ګډون د ګڼو ترهګرو ډلو ګواښ تر اوسه موجود دی.
یر لپېډ وايي: «زه فکر نه کوم چې موږ دې تر اوسه پوه شوي یو چې امریکا ولې داسې کار وکړ. هلته پاکستان دی، د ایران خطر شته، د نورو افراطي او ترهګرو ډلو خطر شته او دا خطر تر اوسه نه دی ختم شوی.»