د افغان سولې لپاهر د امریکا متحده ایالتو د بهرنیو چارو وزارت ځانګړي استازي زلمي خلیلزاد ویلي، له افغانستانه د بهرنیو ځواکونو وتلو سره به افغانان د پرېکړې او فرصت شیبه ولري او د هېواد راتلونکې به د دوی خپلو لاسونو کې وي.
زلمي خلیل زاد پر خپله ټویټر پاڼه لیکلي، افغانان به خپله لار په بشپړه خپلواکۍ کې غوره کړي او په خبره یې افغانان د خپلې جګړې د ختمولو فرصت هم لري.
خلیل زاد ویلي، طالبان اوس له یوه ازمایښت سره مخامخ دي،چې خپل هېواد داسې یوې خوندي او نیکمرغه راتلونکې ته ورسوي،چې ټول وګړي نارینه او ښځېنه په کې له خپلو وړتیاو کار واخلي.
هغه د پوښتنې په توګه ویلي، آیا افغانستان به وکولای شي،چې د خپلو بېلا بېلو دودونو، تاریخونو ښکلا او ځواک نړۍ ته وړاندې کړي؟
خلیل زاد زیاته کړې، په افغانستان کې اوږدې جګړې امریکایان او افغانان له ډېرو اړخونو، ښه او بد، اغیزمن کړي دي.
له دې سره خلیل زاد افغانانو ته د سوله ییزې او ښېرازې راتلونکې هېله څرګنده کړې ده.