د سیاسي چارو شنونکی هلمند هلمند وايي:« بدبختانه،چې په ۲۰ کالونو کې مو ونشو کړی،چې د افغانستان ناورین د تفاهم له لارې حل کړو. خو اوس د افغانانو لپاره یو ډېر ښه فرصت برابر شوی دی. هغه دا دی،چې امریکایان یا د دوی ملاتړ کوونکي له افغانستانه وځي. افغانستان به خپله خپل تګ پيل کوي،یعنی افغانان به خپل تګ پيل کوي. نو د دې لپاره اړېنه دا ده،چې هغه ادارې او هغه ملکي بنسټونه، یا هغه نظامي بنسټونه،چې د افغانستان دي،هغه باید وساتل شي. »
امریکا او ناټو داسې مهال له افغانستانه وځي،چې،پرته له پنجشیر ولایت نه په ټول هېواد طالبان حاکمیت لري، د واک تشه نه ده ډکه شوې او میلیونونه افغانان له بې روزګارۍ او فقر کړېږي.
د سیاسي چارو شنونکی یحی چاوش وايي: « د افغانستان راتلوونکي حکومت او د طالبانو تحریک ته دا اړینه ده،چې په اوسنیو شرایطو کې له متخصصینو، پوهانو او له هغو کسانو، چې د نړیوالو اړیکو برخه کې پوهه لري، له دوی دې په نړیواله کچه، له هېوادونو سره د اړېکو پراخ والي لپاره استفاده وکړي. ترڅو د هېوادونو باور او د مرستې دراوزې د افغانستان پر لور پرانېستل شي. »
طالبان بیا وايي، د امریکا شل کلن اشغال پای ته رسیدلی او له وتلو وروسته به له ټولو هېوادونو سره ښې اړیکي جوړي کړي.
د اسلامي امارت ویاند ذبیح الله مجاهد واي:« موږ له ټولو هېوادونو سره سالمې اړیکي غواړو،که هغه امریکا ده او که نړیواله ټولنه، یوازې په سیاسي او اقتصادي برخه کې نه بلکې په ټولو برخو کې له هر هېواد سره دوستانه اړیکې وپالو. امریکا له شل کلن اشغال وروسته له افغانستان څخه وځي او په افغانستان کې یې زیاتې ستونزې زېږولي دي او اوس د دې ستونزو پای دی.»
شل کاله وړاندې د امریکا له راتګ سره د طالبانو واکمني ړنګه شوه او له هغه مهال راهیسي امریکا او ناټو د پوځي مرستو ترڅنګ په اقتصادي او بېلابېلو نورو برخو کي مرستي وکړې،خو له دې هر څه سره سره اوس امریکا له افغانستانه وځي.