کابل کې د ملالۍ زېږنتون روغتون مسوولین وايي،د طالبانو په راتګ سره یو شمېر روغتیاپالانو دندې پرېښې وې،خو اوس بېرته کار ته را ګرځېدلي دي.
د یاد روغتون مسوولین وايي، یوازې په تیرو ۱۴ ورځو کې یې یو نیم زر ناروغان بستر کړي،چې ځینو په عادي ولادت او ځینې عملیات شوي،چې شااوخوا یونیم زر ماشومان نړۍ ته راغلي دي.
وروستیو تحولاتو د نورو برخو ترڅنګ د دې زیږنتون پر چارو هم اغیزې کړې وې او ناروغان یې له ستونزو سره مخ وو،خو اوس یې چارې بیرته د عادي کېدو پر لور روانې دي .
د دې زیږنتون ډېری کار کوونکې ښځینه ډاکټرانې دي،چې دوي د طالبانو راتګ په لومړیو ورځو کې خپلې دندې پریښې وې،خو اوس ډاډه شوي او د چارو د سمبالښت لپاره بېرته روغتون ته راغلي او په عادي ډول خپل کارونه پرمخ بیايي.
دملالۍ زېږنتون مسوول ډاکتر عتیق وايي:« په تېرو دوو اوونیو کې په نورمال ډول،چې زېږون شوی، شااوخوا زر میندې راغلي او شااوخوا زر ماشومان نړۍ ته راغلي دي.
دغه راز له ۳۰۰ زیات ماشومان د عملیات په وسیله نړۍ ته راغلي دي. یوازې په تېرو دوو اونیو کې په ملالۍ زېږنتون کې شااوخوا ۱۵۰۰ ماشومان نړۍ ته سترګې راغړولي دي.»
د دې ځای ښځینه کارکوونکې،چې نویو پیدا شویو ماشومانو ته روغتیايي خدمات وړاندې کوي، له اسلامي امارت غواړي،چې د راتلونکي حکومت په جوړښت کې د ماشومانو حقوقو ته جدي پام وکړي.
د ملالۍ زېږنتون یوه روغتیاپاله وايي:« زه له اسلامي امارت غواړم،چې له اسلامي اصولو سره سم یو حکومت جوړ کړي،چې د ټولو حقوق په کې خوندي وي.»
په دې سلګونو تازه زېږېدلو ماشومانو کې ګڼ شمېر یې له نهه میاشتو مخکې یا بې مودې زېږدلي،خو د ملالۍ زېږنتون ډاکتران وايي، د ناروغانو او ماشومانو روغتیايي وضعیت ښه دی،ځینې ورسره بستري او ځینې د کابل اندراګاندي روغتون ته لېږدول شوي دي.