د طالبانو اسلامي امارت سیاسي رهبرۍ غړی شیر محمد عباس ستانکزی پنجشیر ته په اشارې وايي، ناټو ته یې ماتې ورکړې،نو داسې وړې جبهې یې پر وړاندې مقاومت نه شي کولای .
ستانکزی وايي، په پنجشیر کې د جګړې پرځای سولې ته ترجیع ورکوي او نور نه غواړي،چې په هېواد کې وینې تویې شي.
ستانکزی وايي،په افغانستان کې جګړه پایته رسیدلې او نه غواړي،چې د وړو ځایونو د ځپلو لپاره خلک ووژل شي.
ستانکزي زیاته کړه:« د نړۍ زبرځواک ته یې ماتې ورکړې او دا وړې وړې ټولنې د دوی ( طالبانو) پر وړاندې هېڅ شی هم نه دي. خو موږ هېڅکله جګړه نه غواړو. نه غواړو،چې د افغانانو وینې تویې شي. خپله نهايي هڅه کوو،چې ستونزې د خبرو له لارې هوارې شي. څومره ژر،چې کېدای شي، دا موضوع دې د خبرو له لارې حل شي. پوځي حل زموږ او تاسو پر ګټه نه ده.»
له شااوخوا دوه اونیو راهیسې د طالبانو او پنجشیر چارواکو ترمنځ خبرې روانې دي،خو تر اوسه پورې پایلې نه دي مالومې شوي.
یوې سرچینې بیا شمشاد ته ویلي، دمګړې د دواړو پلاو ترمنځ هوکړه پر دې شوې،چې ترهغې چې خبرو نتیجه نه وي ورکړې، پر یوبل به بریدونه نه کوي.
اخوا د حزب اسلامي مشر ګلبدین حکمتیار د پنجشیر له ولسونو بیا غوښتنه وکړه،چې باید چاته اجازه ورنه کړي،چې په دغه ولایت کې جګړه وکړي او د دوی ځوانان د پردیو د موخو لپاره قرباني کړي.
د حزب اسلامي مشر ګلبدین حکمتیار وايي:« زموږ مشوره او توصیه د پنجشیر مومن ولس ته دا ده،چې مه پرېږدئ،چې پنجشیر د جنګ په ډګر بدل شي، په داسې حال کې،چې نور په ټول افغانستان کې د جنګ لمبې خاموشه شوي دي.مه پرېږدئ،چې دلته د جنګ اور بل شي.یقینا،چې بهرنیان له تاسو سره مرسته نه شي کولائ. مه پرېږدئ، ستاسو زامن د پردیو ګټو قرباني شي. مسله د روغې جوړې او تفاهم له لارې حل کړئ.»
د طالبانو له لوري د پنجشیر نه نیولو شکونه راپیدا کړي او غوښتنه دا ده، دغه ولایت،چې هم دافغانستان خاوره ده باید د برخلیک په تړاو یې اقدام وشي او په همدې حال یې پاتې کیدل راتلونکي کې ستونزې جوړه ولای شي .
د سیاسي چارو شنونکی عزیز معارج وايي:« د پنجشیر ولایت نه نیولو شکونه راپیدا کړي او یو ګونګ حالت یې رامنځته کړی او په ځانګړې توګه هلته د فرانسې ځېنې یهودانو لېدل. د طالبانو له لوري د ټول افغانستان ولکه کول په زور یا تفاهم او پنجشیر ته نه ننوتل، خامخا، یو شکونه راپورته کوي. خو بیا هم تر اخره پورې پاتې کېدل یې، ډېر ګواښ لري. »
له بل لوري بیا د امریکا مشرانو جرګې ځینو غړو ویلي،چې امریکا باید د طالبانو پر وړاندې په پنجشیر کې راټوله شوې جبهه په رسمیت وپیژني.
دمګړۍ د پنجشیر چارواکو او طالبانو ترمنځ خبرې روانې دي،خو جزئیات یې نه دي رسنیز شوي.
له پنجشیره نشر شوې ویډیو ګانې ښه یي،چې په دغه ولایت کې د جګړې لپاره پرچمتوالي کار وران دی.
