د سمنګان ولایت شهر قدیم اسپندسای سیمه کې د اوبو زېرمه کولو یو کوچنی بند د ۲۷ میلیونه افغانیو په لګښت د ۹میاشتو په موده کې د یوه سوداګر په مالي ملاتړ بشپړ او ګټې اخیستنې ته وسپارل شو.
د اوبو او انرژۍ وزارت سرپرست مولوي عبدلطیف منصور ياد بند او چک ډيمونه د اوبو په مهارولو کې مهم بولي او زياتوي، د ورته بندونو په جوړېدو سره به په سمنګان کې د اوبو کمښت ستونزه څه نا څه حل شي.
هغه زیاتوي: « موږ دلته د دوو کارونو لپاره راغلي یو، یو دا چې تېر کال مو د دې بند کارونه پيل کړل او اوس دا دی ګټه اخیستنې ته سپارل کېږي. دویم دا چې د اسلامي امارت د اوبو او انرژۍ وزارت له بودیجې څخه هرې ولسوالۍ ته د یوه چک ډیم جوړول منظور شوي وو او نن ورځ په سمنګان کې د ۶ چک ډیمونو پرانستنه کوو. پر دغو چک ډیمونو ۴۴ میلیونه افغانۍ لګښت راغلی.»
ورته مهال، سیمه ییز چارواکي وایي، د اوبو دغه بند له پرانیستلو وروسته به یاد ولایت کې د موسمي سېلابونو خطرونه هم کم او د اوبو مهارولو ترڅنګ به بزګران ترې د خپلو کروندو خړوبولو لپاره ګټه واخلي.
د سمنګان والي محمد شعیب رسالت وايي: « هر هېواد د خپلو خلکو په لاس آبادېږي. موږ د دې هېواد له یوه خیرخواه انسان مننه کوو چې د ۲۷ میلیونه افغانیو په لګښت یې دغه بند جوړ کړ. همدارنګه موږ له ټولو افغان پانګوالو او په ځانګړې توګه سمنګانیانو هیله لرو چې د خیر په دغه شان کارونو کې ونډه واخلي.»
د سمنګان اوسېدونکي که څه هم د اوبو د دغه زېرمه کوونکي بند له جوړېدو هرکلی کوي، خو د خرم و سارباغ ولسوالۍ کې هم د یوه بند پر جوړېدو ټینګار لري.
د سمنګان اوسېدونکی عبدالبصیر حکیمي وايي: «موږ له اسلامي امارت او دلته له راغلي پلاوي څخه غوښتنه کوو چې سمنګان ولایت ته ځانګړې پاملرنه وکړي. زموږ ولسونه که څه هم بېوزله دي خو چمتو دي چې له حکومت سره همکاري وکړي او له خپل وس سره سم ونډه واخلي.»
د اوبو دغه کوچنی بند د سمنګان مرکز ایبک ښار اړوند شهر قدیم اسپندسای سیمه کې داسې مهال ګټې اخیستنې ته سپارل کېږي چې د دې ولايت ګڼې سیمې له وچکالۍ سره مخامخ دي او په ډېرو ساحو کې خلک د څښاک پاکو اوبو ته هم لاسرسی نه لري.
