د اسلامي امارت د ریاست الوزرا مقام د يوې خبرپاڼې په خپرولو سره له دیني علماوو غوښتي چې د خلکو په منځ کې د شک او رواني نا آرامۍ مخنیوي په موخه په اختلافي موضوعاتو له بحث کولو ډډه وکړي.
دغه خبرپاڼه چې د اسلامي امارت ویاند ذبیح الله مجاهد خپره کړې، اته مادې لري او ټینګار په کې شوی چې د علماوو حیثیت باید زیانمن نه شي.
خبرپاڼه کې ویل شوي چې علماء کرام دې په اختلافي مسایلو له بحث کولو ډډه وکړي.
د خبرپاڼې یوه برخه:« علماء کرام دې له هغو بحثونو او خبرو په کلکه ډډه وکړي چې اختلافي بحثونو او مناظرو ته لاره هواروي. دغه بحثونه د عام ولس د تشویش او رواني نا آرامۍ لامل ګرځي او په پایله کې یې د علماوو او علم وقار او حیثیت ته زیان رسېږي. علماء کرام دې د هغو نادرو موضوعاتو، قضایاوو او د علماوو د تفرداتو بیانولو څخه ډډه وکړي چې د ځینو خلکو لپاره د فتنې لامل ګرځي او عامه ذهنیت یې له درک څخه عاجز وي.»
دغه راز خبرپاڼه کې ټینګار شوی چې دیني عالمان باید یوازې هغه مسایل د جوماتونو او رسنیو له لارې بیان کړي چې ټولنه کې اتفاق او یووالی لا پیاوړی کوي.
له دې سره، دیني عالمان او تحلیلوونکي د اسلامي امارت دغه اقدام ستايي او ټینګار کوي چې د نظام او ممبر نظر باید یو واوسي.
د دیني چارو شنونکی عبدالحق حماد وايي: « دا د افغانستان د علیا مصالحو د پالنې هغه برخه ده چې پایله کې یې هغه جنجالي بحثونه یا هغه غیر مفید بحثونه دروي چې اختلافونه، بدګومانۍ او نفاق رامنځته کوي. دې ته جدي اړتیا وه چې علما په یوه داسې چوکاټ کې ځای شي چې د دوی ترمنځ علمي اختلافونه تر علمي دستګاوو او تربیت ځایونو کې محدود پاتې شي.»
خبرپاڼه کې اتو ټکو ته اشاره شوې او ټینګار کوي چې اسلامي امارت هېچا ته د اختلاف پیدا کولو، تفرقه اچولو، نزاع او فتنو جوړولو اجازه نه ورکوي او د مخنیوي په اړه یې جدي ګامونه پورته کوي.
د خبرپاڼې یوه برخه: « ځینې عجیب او غریب مسائل چې فقهې یا مسلکي کتابونو راوړي، یا مجتهدینو د فقه الافتراضي له مخې استخراج کړي او وقوع یې عامه نه وي، د دین له ضروریاتو هم نه وي، په عامه منابرو او مجالسو کې دې نه بیانیږي، ځکه له داسې مسائلو د دین دوښمنان تمسخر جوړوي، د دین او علم اهانت ورسره کیږي. علماء کرام دې هڅه وکړي چې په عامو سټیجونو او رسنیو کې یوازې هغه مسائل بیان کړي چې د خلکو د آخرت او دنیا ګټه او سعادت ورسره تړلی وي، اتفاق او اتحاد ور باندي ټینګیږي د غیر ضروري عجائبو او غرائبو پر ځای دې دیني عقاید، دیني احکام، اسلامي اخلاق، د ورځنیو جاري معاملاتو په اړه دیني مسائل او د اسلام له پراخې علمي ذخیرې څخه دې هغه څه خلکو ته بیان کړي چې هغوی ورته اړتیا لري.»
کارپوهان د ریاست الوزرا له دې پرېکړې هرکلي کوي او وایي، پرهغو موضوعاتو باید بحث ونه شي چې د ملت او حکومت ترمنځ اختلاف رامنځته کوي او په خبره یې ځیني مسایل د دې لامل ګرځي چې ملي ګټو ته زیان رسوي.
د چارو شنونکی ادریس محمد ځاځی وايي:« دا ښه خبره ده، باید هېڅوک هم هغو موضوعاتو ته لمن ونه وهي او داسې بحثونه ونه کړي چې د اختلافونو او تقابل سبب کېږي او ټولنه په څو برخو وېشي او دغه راز د ملت او حکومت ترمنځ درځ پيدا کوي.»
د ریاست الوزرا په دغه خبرپاڼه کې ټینګار شوی چې دغه پرېکړه کابل کې د ۱۴۰۱ کال د چنګاښ په ۱۲مه د علماوو په یوه غونډه کې شوې او هېڅوک ترې سرغړونه نه شي کولی.
