ولسمشر محمد اشرف غني ویلي، د افغان ځواکونو ځانګړو او صفري قطعاتو ته تازه جلب و جذب روان دی،چې دا ډلې به لا پیاوړي شي.
ولسمشر غني چې پرون یې د کابینې په ناسته کې د وروستیو سیاسي بدلونونو، د امنیتي او دفاعي ځواکونو د تجهیز، د وسله وال پوځ او په ځانګړي ډول د ځانګړو قطعاتو، کومانډو او صفري قطعاتو ته د جلب و جذب په اړه خبرې کولې وویل، دا قطعات متحرک دي، ورته هوایي او ځمکني تجهیزات او امکانات او زرهي وسایط برابر شوي،چې قاطع عملیات کوي او بېرته خپلو مرکزونو ته راګرځي.
ولسمشر وویل، ځانګړي قطعات دوباره منظم شوي او د کومانډو پر قطعاتو کار روان دی.
د ولسمشري ماڼۍ د مالوماتو له مخې، ولسمشر د افغان سولې روانو خبرو ته په اشارې ویلي، هېڅ راز معامله او د تسلیمېدو اراده موجوده نه ده،موږ باعزته ژوند کوو او نن د غیرت، عزم او ارادې ورځ ده.
هغه زیاته کړې، که طالبان فکر کوي،چې له موږ تسلیمي اخلي، په سلو کلونو کې به یې هم دغه ارمان پوره نشي.
