څه موده وړاندې د افغانستان لپاره د روسيې ځانګړي استازي ضمير کابلوف له قوله داسې راپورونه خپاره شول، چې د بنديزونو له لېسټ د طالبانو ايستلو په اړه وروستۍ پرېکړه د ولسمشر ولاديمير پوتين پر مېز اېښودل شوې.
خو تازه په کابل کې د روسیې سفیر ډیمیټري ژیرنوف له ټاس خبري آژانس سره په مرکه کې ویلي، د بنديزو له لېسټ د طالبانو ايستلو او د د اسلامي امارت د رسميت پېژندلو په اړه هر ډول مثبته او منفي پرېکړه به، د روسيې د ګټو په رڼا کې کېږي.
د ژیرنوف وايي، د سيمې هېوادونو له افغانستان سره اړيکې د خپلو ګټو په رڼا کې تعقيب کړې او روسيه هم حق لري، څو له خپل دې حق په استفادې پرېکړه وکړي.
هغه زیاتوي:« د طالبانو تحریک د سیمې د هر هېواد په تور لېست کې شامل نه دی. له همدې کبله هر هېواد د خپلو موخو او له افغانستان سره د خپلو اړیکو له مخې پر مخ ځي.»
ژيرنووف په خپلو څرګندونو کې دا هم ويلي، په اوس وخت کې د دواړو هېوادونو ترمنځ دوه اړخیزه سوداګري د پخوا پرتله څو برابره زیاته شوې.
هغه وايي:«د افغانستان سرپرست حکومت د چارواکو هغو څرګندونو ته په کتو، چې د کابل او مسکو ترمنځ یې د همکاريو زياتولي په اړه يې کړې، په اوس کې د دواړو خواوو ترمنځ دوه اړخيزه سوداګري څو برابره زياته شوې.»
د سیاسي چارو کارپوهان د افغانستان له خاورې د نشهيي توکو او د ترهګرۍ د انتقال فرضيه د روسیی لپاره دایمي اندېښنه بولي او وایي، په دې اړه له سرپرست حکومت د ډاډ ترلاسه کول د مسکو لپاره ډېره مهم دي.
د سیاسي چارو کارپوه معین ګل څمکنی وايي:« د مسکو دایمي اندېښنې دا دي چې دوی وايي، له افغانستانه د تروریزم صادرېدل او د نشه يي توکو مساله د دوی لپاره د اهمیت وړ ده. اوس چې دوی باوري دي، چې د ترورزیم په اړه اسلامي امارت تر حده پورې کار کړی او همدا شان د نشه يي توکو په لمنځه وړلو کې یې هم کار کړی. نو اوس دوی اندېښنه لري، چې منځنۍ اسیا او قفقاز ته د دوی په اصطلاح تروریستي ډلې دننه نه شي، تر څو د روسیې شاوخوا ته امنیت ګډوډ کړيٍ.»
خو ځینې نور بیا د شرقي او غربي بلاکونو رقابتونو ته په اشارې وایې، روسي چارواکو په سیمه کې د امریکا له سیاسي او نظامي نفوذ د مخنیوي په موخه دا ډول څرګندونو ته مخه کړې.
له دې وړاندې د افغانستان لپاره د روسيې ځانګړي استازي ضمير کابلوف ويلي ول، چې د دې هېواد بهرنيو چارو او عدليې وزارتونو په احتمالي توګه د بنديزونو له لېسټ د طالبانو ايستلو په اړه ولسمشر ولادیمیر پوتين په جريان کې کړی، خو تر دې مهاله د روسيې له لوري په دې اړه غوڅه پرېکړه نه ده شوې.
