د پښتون ژغورنې غورځنګ غړي او شاعر ګیله من وزیر جنازه د زرګونه کسانو له لوري له اسلام اباد تر شمالي وزيرستانه يوړل شوه او د جنازې له لمانځه وروسته په اسدخېلو کلي کې خاورو ته وسپارل شو.
د پښتون ژغورنې غورځنګ مشر منظوراحمد پښتن په پيښور، بنو، میرانشا او نورو بېلابېلو سیمو کې ویرجنو ته ویناوې کړي او په لومړي ځل یې له حکومته د غچ اخیستلو سخت خبرداری ورکړ.
له وزیرستان سربېره، په کابل کې هم سلګونه کسانو په حضوري چمن کې د هغه غیابانه جنازې لمونځ ادا کړ.
وزیر په خپلو انقلابي شعرونو کې پښتانه یوالي ته رابلل او د قام لپاره یې عدالت غوښتنه کوله چې وژل کېدو یې په لر او بر افغانانو سربېره د نړۍ په ګوټ ګوټ کې د افغانانو سخت غبرګونونه راپارولي دي.
لېکوال او شاعر غفور لېوال د ګیله من وزیر مړېنې ته په اشاري وایي، ګیله من وزیر یو مبارز ځوان وه او په خبره یې د هغه مبارزې ته باید دوام ورکړل شي.
هغه زیاتوي:« زه یې اورم، د ملتپالنې د دغه ځوان شهید اروا یې راته وايي، چې ، د هغه پر اوږو، د هغه په ټټر، د هغه په زړه او د هغه په زخمونو ولاړ بیرغ لوېدو ته مه پرېږدئ. ما د شهید جانان له هره زخمه بله کړه ډيوه لارې ته، زه به د تورو تیارو جنګ ته ترې راوباسم لمبه لارې ته.»
د افغانستان د کرېکټ ملي لوبډلې لوبډل مشر راشد خان، محمد نبي عسی خېل، رحمان الله ګربز، نوین الحق د ګیله من وزیر مړېنه د هغه کورنۍ، د غورځنګ پلویانو او ټولو پښتنو ته تسلیت ویلی دی.
د ملي لوبډلې توپ وهونکی رحمان الله ګربز وايي:« په پښتنو مین او ولسي شاعر ګیلمن وزیر ته دې رب لايزال جنت الفردوس نصیب کړي، کورنی او دوستانو ته یې د تسلیت ترڅنګ له لوی رب نه صبر جمیل غوښتونکی یم.»
ګیله من وزیر د پاکستان پر دولت سختې نیوکې کولې او د قام لپاره یې د عدالت غوښتنه کوله.
اوس پوښتنه داده، چې د پنځه ورځو په تیریدو ولې د پاکستان حکومت د برېدګرو په نیولو او پیدا کېدو کې پاتې راغلی دی.
د سیاسي چارو شنونکی حکمت الله حکمت وايي:« د شهید ګیله من قاتل هغه څوک دی، چې صمد خان یې شهید کړ، عثمان کاکړ یې شهید کړ، ارمان لوڼي، طاهر داوړ، عارف وزیر او نور یې رانه واخېستل. دا ترهګر حکومت غواړي چې د آزادۍ فکر ووژني. دغه شان ستر شخصیتونه لکه ګیله من له موږ اخېستل، د دوی په فکر باندې د هغې مبارزې خاتمه ده، کومه چې دې ولسونو په پېړو باندې د خپل حق لپاره کړې، خو د شهید ګیله من جنازې مراسم او نن به یې تاسې وګورئ، دا یې وښودله چې د هرې قربانۍ په ورکولو سره دا ولسونه نور را وېښ کېږي.»
د سیاسي چارو شنونکی کمال ناصر اصولي وايي:« دغه ظلم او استبداد د تاریخ په اوږدو کې روان دی، موږ یې ګورو. په جمهوریت کې هم د دغه ظلم او استبداد په اړه غږ پورته کړی وه او تر نن ورځې پورې د لر او بر له داعیې تېر شوي نه یو. په همدغه ډول به د هغو ځوانانو چې قربانۍ ورکوي، ملاتړ کوو او ورسره به قدم په قدم یو ځای ځو.»
ګیله من وزیر د جولای پر اتمه په اسلام اباد کې د څو کسانو لخوا، چې د غورځنګ د ادعا له مخې، چې مشري یې ازاد داوړ کوله او د تحريک انصاف ګوند غړی دی په بې رحمۍ په چاړو ووهل شو چې تراوسه یې پوليسو عاملان نه دي نيولي.
د ګیله من وزیر اصلي نوم حضرت نعیم او د شمالي وزیرستان د رزمک سېمې د اسدخېلو کلي اوسېدونکی وو. ګیله من وزیر دوه وادونه کړي او پنځه اولادونه چې دوه یې هلکان او درې نجونې دي ترې پاتې شول. هغه د پښتون ژغورنې غورځنګ د مشر منظوراحمد پښتین له نږدې ملګرو او د یاد غورځنګ د مرکزي شورا غړی وه.
