د اسلامي امارت ویاند ذبیح الله مجاهد چې د افغانستان په تړاو یې د ملګرو ملتونو پر مشرۍ د دوحې درېیمې ناسته کې ګډون کړی و؛ پرته له دې چې د کوم هېواد نوم واخلي ویلي، د یوه هېواد استازي هڅه وکړه چې کنفرانس ته د افغانستان ناسم انځور وړاندې کړي خو په خبره یې بریالی نه شو.
مجاهد له افغانستانه د ترهګریزو ګواښونو او مخدره موادو قاچاق په تړاو د هېوادونو اندېښنې بېځایه ګڼي وايي، تېرو درېیو کلونو کې اسلامي امارت د ترهګرو پر وړاندې جدي مبارزه کړې او د مخدره موادو کرکېله او کاروبار کچه یې نږدې صفر ته ښکته کړې.
د سیاسي چارو یو شمېر شنونکي، پاکستان، ایران او تاجکستان ته په اشارې سره وایې، اوس هم په سیمه کې داسې هېوادونه شته چې نه غواړي په افغانستان کې ثبات او تل پاتې سوله تامین شي.
دوی زیاتوي، د پاکستان او تاجکستان په شمول یو شمېر نور هېوادونه هم هڅه کوي، نړیوالو ته د افغانستان ناسم انځوروړاندې کړي؛ خو ټینګار لري چې اسلامي امارت دې هغه غوښتنې چې ولسونه او ځېنې هېوادونه یې لري عملي کړي او نړۍ ته دې وښيي چې افغانان د تروریزم تمویلونکي نه بلکې قربانیان او له جګړې ستړي دي.
د سیاسي چاروشنونکی محمد ادریس ځاځی وايي: « اوس هم ګڼ شمېر هېوادونه داسې دي چې د اسلامي امارت پر مثبتو کړنو پرده ور اچوي او نه پرېږدي چې دغه ابهامات له منځه لاړ شي او نړیوالو او اسلامي امارت ترمنځ فاصلې کمې شي. په دوحه کې د اسلامي امارت لاسته راوړنه دا وه، چې دوی وکولی شول له نړیوالو سره چې کومې کشالې دي هغه حل او فصل کړي، بحث پرې وکړي او د حل یوه لار ورته پیدا کړي او هغه ابهامات او شایعات چې د نړیوالو تر غوږ رسېدلي، اسلامي امارت یې سپیناوی وکړي.»
د سیاسي چارو شنونکی معین ګل څمکنی وايي: « یو شمېر هېوادونه چې د حکومتي مسوولینو له لخوا یې نوم نه دی ذکر شوی او غوښتل یې د دوحې په غونډه کې مزاحمت رامنځته کړي؛ نو زما په نظر مخکې هم داسې ویل کېدل پاکستان غواړي افغانستان ناامنه وښيي او تل له افغانستان سره د ګاونډیو لخوا دوه ګونی چلن شوی دی.»
ځېنې نور بیا وايي، د دوحې ناسته د افغانستان لپاره مهمه او ښه لاسته راوړنکې او نړیوالو ته هم دا مطرح شوه چې افغانستان هغسې نه دی، لکه څنګه چې یې ځېنو هېواونو د خپلو سیاسي اهدافو لپاره ناسم انځور وړاندې کاوه.
د سیاسي چارو شنونکی عزیز معارج وايي: « نړۍ ژمنه وکړه، چې افغانستان سره به اړیکې هم ساتي او مرستې به هم کوي؛ نو دا پړاوونه به دوام کوي او راتلونکوغونډو کې به د دې ژمنو پوښتنه کېږي او بیا به یې په اړه پرېکړه کېږي، چې دا د افغانستان لپاره چې اوس به انزوا کې دی غټه لاسته راوړنه ده. دا سمه ده چې ګاونډي هېوادونه په ځانګړې توګه پاکستان هڅه کوي چې نړۍ ته د افغانستان ناسم انځور وړاندې کړي او تورونه پورې کوي چې دلته ټي.ټي.پي ده، دلته ترهګر دي او دلته ګواښ دی او نشهيي توکي دي، همداسې نور هېوادونه لکه ایران او تاجکستان هم دا هڅې کوي؛ خو نړۍ هم درک لري او د اسلامي امارت چارواکي هم باید په دې هکله وضاحت ورکړي.»
دا په داسې حال کې ده، چې وړمه ورځ د پاکستان بهرنیو چارو وزارت ویاندې، ممتاز زهرا بلوچ اونيز کنفرانس کې ويلي ول، چې د دوحې په درېيمه ناسته کې يې استازي له افغانستانه د ترهګریزو ګواښونو پر زياتوالي اندېښنه څرګنده کړې.
