د ملګرو ملتونو عمومي منشي انټونیو ګوتېریش د شانګهای همکاریو سازمان په ۲۴مه کلنۍ ناسته کې د وینا پر مهال له ترهګرۍ سره د مبارزې په موخه له افغانستان سره د همکارۍ غوښتنه کړې.
ګوتېریش په خپله وینا کې افغانستان کې سوله یوه اړتیا بللې او د دې سازمان له غړو هېوادونو یې غوښتي چې سره متحد شي او پرې نه ږدي چې افغانستان بیاځلي د ترهګرې پر خوندي مرکز بدل شي.
نوموړي د دې ترڅنګ یو ځل بیا په افغانستان کې د داسې ټولګډونه حکومت د رامنځته کېدا غوښتنه کړې چې په وینا یې وکولی شي بشري حقونه تضمین کړي او په نړیواله ټولنه کې مدغم شي.
هغه زیاته کړې: « موږ په افغانستان کې سولې ته اړتیا لرو او داسې یو ټولګډونه حکومت ته هم، چې بشري حقونو ته درناوی وکړي او په نړیواله ټولنه کې مدغم شي. ټول هېوادونه باید متحد شي، څو افغانستان بیا ځلې د ترهګرۍ پر مرکز بدل نه شي. ملګرو ملتونو سازمان له ترهګرۍ سره د مبارزې په برخه کې د شانګهای همکاریو سازمان سره په هر ځای کې همکارۍ ته چمتوو دی.»
هغه دغه راز په خپله وینا کې په اوکراین، سوډان، عاج ساحل، کانګو، سومالیا او میانمار کې د سولې د ټینګښت غوښتنه کړې.
د ملګرو ملتونو سرمنشي ویلي، شانګهای سازمان په نړیواله کچه د یوه لوی سیمهییز سازمان په توګه هغه ځواک او مسوولیت لري، چې د سولې په برخه کې جدي اقدامات ترسره کړي.
د سیاسي چارو شنونکی سلیم پیګیر وايي: « افغانستان د ۴۴ کلونو په اوږدو کې د نړیوالې ترهګرۍ قرباني و، که د سیمې او لوی هېوادونه ونه غواړي چې افغانستان دې د ترهګرۍ ځاله وي؛ نو هېڅکله به دلته ترهګري نه وي، ځکه هم هغوی دي چې دا ډلې رامنځته کوي، ملاتړ یې کوي او د یو بل پر ضد یې کاروي.»
یو شمېر شنونکي د نړیوال امنیت او سوله ساتنې په برخه کې د ملګرو ملتونو رول اړین ګڼي او له دې سازمانه غواړي، چې خپلو واکونو ته په کتو دې په دې برخه کې عملي ګامونه پورته کړي.
بل پلو دوی پر دې سازمان نیوکه کوي، چې ګواکې د نړیوالو شخړو په حل کې یې خپلواک عمل نه دی کړی او پرېکړې یې هم تر ډېره د زبرځواکونو تراغېز لاندې ترسره شوي.
د سیاسي چارو شنونکی جنت فهیم چکري وايي: « په رښتیا هم چې شانګهای او سیمې هېوادونه باید هڅه وکړي چې د افغانستان ملاتړ وکړي او مرسته ورسره وکړي چې د ترهګرۍ په کور بدل نه شي. دا د سیمې او ګاونډیو هېوادونو لومړنی مسوولیت دی چې افغانستان کې د امنیت د تامین لپاره عملي اقدام وکړي.»
ملګري ملتونه داسې مهال په افغانستان کې د ترهګرۍ د ودې په تړاو اندېښنه ښيي، چې له دې وړاندې سرپرست حکومت په ځلونو نړۍ ته ډاډ ورکړی او ویلي يې دي، چې هېڅ یوې وسلهوالې ډلې ته د دې اجازه نه ورکوي، چې په افغانستان کې په ترهګریزو کړنو لاس پورې کړي او له دې ځایه د ګاونډ او سیمې امنیت ته ګواښ پېښ کړي.
