په داسې حال کې چې د ښوونې او روزنې د کيفيت ټيټوالي په تړاو د خلکو شکايتونه زيات شوي، د پوهنې وزارت سرپرست حبیبالله اغا شمشاد ته تائيدوي چې د ښوونې او روزنې کيفيت ټيټ دی.
حبيبالله اغا چې خوست ته د ښوونځيو او نورو علمي مرکزونو د ليدنې په موخه تللی وايي، د عصري او ديني زدهکړو کيفيت ټيټوالي ته په کتو يې داسې هڅې پيل کړې چې په علمي مرکزونو کې د زدهکړو کيفيت لوړ کړي.
هغه زیاتوي: « که عصري علوم دي او که دیني بې کیفیته روان دي. موږ دې ته ډېره توجو کوو چې دا علوم ټول با کیفیته شي، ډېر توجو مو ده ورته.»
له کابو دوو کلونو راهيسې په ډېری ولايتونو کې د ښوونځيو زدهکوونکي، د ښوونکو له کموالي شکايت کوي او زياتوي چې له همدې کبله يې درسي پلان نیمګړی پاتې دی.
د پوهنې وزارت سرپرست هم په ښوونځيو کې د ښوونکو کمښت تائيد او وايي، د يادې ستونزې د حل په موخه به نږدې راتلونکي کې شاوخوا ۴۰ زره نوي ښوونکي پر دندو وګومارل شي.
نوموړی همدا راز زیاتوي چې، تېر کال یې په ټول هېواد کې د ځېنو همکارو مؤسسو پرمټ د ۶۲۰ ښوونځیو لپاره ودانۍ هم جوړې کړې او په پلان کې ده، څو روان کال هم د همکارو ادارو په مرسته د ښوونځیو د سرپناه په برخه کې خپل پام ډېر کړي.
هغه وايي: « داسې ولایتونه شته چې هغه په ۵۰ زده کوونکي، ۱۰ ښوونکي لري او داسې ولایتونه شته چې هلته په ۱۰۰ زده کوونکو یوازې یو ښوونکی لري؛ موږ ان شاءالله هڅه کوو چې دغه بې انصافي له منځته لاړه شي او هغه ولایتونه موږ مالوم کړي چې ښوونکو ته اړتیا لري.»
حبيبالله اغا ټینګار کوي چې په اوسني عصر کې تر ټولو زیاته اړتیا زدهکړو ته لیدل کېږي او په خبره يې پوهنې وزارت له نورې نړۍ سره د سیالۍ لپاره، د زده کړو د کیفیت ښه والي لپاره خپلې هڅې پیل کړې.
نوموړی دا څرګندونې داسې مهال کوي چې د خوست ترڅنګ په ټول هېواد کې خلک وخت ناوخت د پوهنې په برخه کې له کمزورو خدماتو شکایت کوي او له سرپرست حکومته د ښوونې او روزنې بهیر د پیاوړتیا غوښتنه کوي.
