د ټي.ټي.پي او پاکستان ضد وسلهوالو ډلو د ځپلو په موخه د ډيورنډ فرضي کرښې دا غاړه د عملیاتو د پیل او د افغانستان د ملي حاکمیت د نقض په تړاو د پاکستان دفاع وزیر خواجه اصف تر وروستیو څرګندونو وروسته، اسلامي امارت ملي دفاع وزارت ویاند په غبرګون کې د ياد پاکستاني چارواکي څرګندونې ناسنجیده او پاروونکې بللي.
ملي دفاع وزارت وايي، په هره پلمه پر افغان خاوره د هېوادونو هر راز تېری بې ځوابه نه پاتې کیږي او هر ډول احتمالي عواقب به یې د تېري کوونکي پر غاړه وي.
د دغه وزارت ویاند عنایت الله خوارزمي پر پاکستاني لوري غږ کړی چې هېچاته پر حساسیت پاروونکو ورته ملي مسائلو نظر څرګندولو ته اجازه ورنه کړي، چې په خبره یې د هېڅ لوري په ګټه نه دي.
هغه زیاتوي:« د افغانستان د ملي حاکمیت د نقضولو په اړه د پاکستان د ملي دفاع وزارت د وزیر څرګندونې یو ناخوښ عمل او د اوبو خړولو په مانا دي چې د هېڅ لوري پر ګټه نه دي. د پاکستان رهبرۍ ته په کار ده چې هېڅ چاته دا اجازه ورنه کړي چې د حساسو موضوعاتو په اړه دا ډول پاروونکې څرګندونې وکړي. د افغانستان اسلامي امارت ملي دفاع وزارت دا څرګندوي چې که هر څوک په هره پلمه زموږ پر حریم تېری وکړي؛ نو د پایلو مسوولیت به یې پر خپله غاړه وي.»
په ورته مهال ملي دفاع وزارت وايي، اجازه نه ورکوي چې افغان خاوره د نورو پر ضد وکارول شي.
پاکستان په پرلپسې توګه تور پورې کوي، چې ګواکې هلته ترسره کېدونکي وسله وال بریدونه د ډیورنډ فرضي کرښې دا غاړه طرحه کېږي.
خواجه اصف د پاکستان امنیت تر هر څه مهم ګڼي او په خبره یې د دې کار لپاره افغان خاوره کې هم پر عملیاتو سربېره هر ګام پورته کولو ته چمتو دي.
د سیاسي چارو شنونکی توریالی ځاځی وايي: « دا هغه پلمې او بهانې دي چې د انګرېزانو په وسیله دوی ته دستور ورکول کېږي او خپله پاکستان هم نه غواړي چې افغانستان یو پیاوړي نظام ولري؛ نو همدې لپاره د دې هېواد پر وړاندې ډېر قاطع چلن ته اړتیا ده. دا ځل چې پاکستان هر جزوي عمل ترسره کړي د افغانستان ملي دفاع وزارت دې یې پر وړاندې لس چنده جدي عمل ترسره کړي.»
د سیاسي چارو شنونکی عزیز معارج وايي: « کاش پاکستان داسې یو عمل ترسره کړي چې افغانان راوپاروي او که دا راوپارېدل نو بیا به له اټوم، وسلو او مسایلو سره دا پنجابیان هند خوا ته ځي او افغانان تر اټکه پورې همدې ته ناست دي او نوره یې حوصله ډېره تنګه شوې، ان له هغې غاړې افغانان، پښتانه او بلوڅان هم نور تر پزې راغلي دي.»
پاکستان له دې وړاندې هم تېرکال د کب میاشتې په ۲۷مه د خوست پر سپېرې او د پکتیکا په برمل ولسوالیو کې د عامو خلکو پر کورونو هوايي بمباریو کې د ښځو او ماشومانو په ګډوڼ اته کسان ووژل او ګڼ شمېر نور يې ټپیان کړل.
سرپرست حکومت هغه مهال هم دغه برید غیرسنجیده اقدام او د افغانستان پر حریم تجاوز بللی و.
د سیاسي چارو شنونکی واحد فقیري وايي: « پاکستان عموماً دا خبرې کړي دي، څو ځله یې کړي او دا په دې خاطر هم کوي چې د افغانستان له لوري تراوسه جدي عکسالعمل نه دی ښودل شوی، دا که د جمهوریت په وخت کې هم و پاکستان څو ځل پر افغانستان بمباري کړې، په دې خاوره یې تېری کړی او اسلامي امارت په وخت کې هم دې تېري دوام پیدا کړی دی؛ نو پاکستان پوهېږي چې افغانستان د متقابل ځواب امکانات په لاس کې نه لري.»
د پاکستان د بهرنیو چارو وزیر پر افغان خاوره د احتمالي بریدونو په تړاو تفصیل نه دی ورکړی خو ویلي يې دي، چې د پاکستان د امنیت ساتنې لپاره چمتو دي دغه عملیات ترسره کړي.
د دغه لوړپوړي پاکستاني چارواکي دغه څرګندونې داسې مهال دي چې د جون پر ۲۳مه د پاکستان لومړي وزیر په مشرۍ یوې لوړپوړې کمېټې د ترهګرۍ پر وړاندې د ٬٬عزم استحکام،، په نوم د پوځي عملیاتو د پیلېدو خبر ورکړی و.
