که څه هم ګرځنده ځيرکو مبايلونو خلکو ته له نړۍ سره د نښلېدو زمینه برابره کړې، خو په ورته وخت کې سرخوږی هم دی.
ډېر کله د ځیرکو مبايلونو په وسيله ستر جرمونه ترسره کېږي؛ خو په اوس کې د ټکنالوژۍ په پرمختګ سره د دغو ځېرکو مبايلونو د څارنې نوي سېسټومونه جوړ شوي چې پر بنسټ یې تر یوه حده د جرمونو کچه راکمه شوې.
افغانستان یو له هغو هېوادونو دی، چې د ځیرکو مبايلونو په وسيله په کې جرایم ترسره کېږي؛ خو کورنیو چارو وزارت په یوه اقدام کې د ځیرکو مبايلونو د ثبت لړۍ له یوه کال راهیسې جاري ساتلې.
د دغه وزارت ویاند عبدالمتین قانع وايي، دغه کار د موبايلونو خونديتوب په موخه کوي او په خبره يې د دې پروسې له لارې يې د ځيرکو مبايلونو درلودونکو ته د ثبت ځانګړې فورمې وېشلې دي.
هغه زياتوي، د دې پروسې له لارې توانېدلي چې ۷۰۴ غلا شوي مبايلونه بېرته پيدا او خپلو اصلي مالکینو ته يې سپارل شوي دي.
قانع وايي: « د هېواد والو ګرځنده ټیلیفونونو د ساتنې او خوندیوب په موخه د کورنیو چارو وزارت اړوند انتک ریاست د ټیلیفونونو په اړه ډېر منظم او پرمختللی الکټرونیکي سېسټم رامنځته کړی، تر څو د هېوادوالو شخصي ټيلیفونونه په بشپړه توګه خوندي شي. څه د پاسه له یوه کال راهیسې په دې سېسټم کې د هېواد والو د ټیلیفونونو د ثبت پروسه دوام لري او فورمې هم توزیع شوې دي، باید یادونه وکړم چې د دې لړۍ په لړ کې څه د پاسه ۷۰۴ غلا شوي ټيلیفونونه پیدا شوي او خپلو اصلي مالکینو ته سپارل شوي. موږ هڅه کوو چې په راتلونکي کې د هېواد په ګوټ ګوټ کې دا سېسټم عملي کړو.»
په ورته مهال خلک د سپرست حکومت له دې پرېکړې هرکلی کوي او باوري دي، چې له دې سره به د جرمونو کچه راښکته شي.
دوی همداراز له سرپرست حکومته غواړي، چې د امنیت ټینګښت کې ورته اقدامات زیات کړي ترڅو په امنه فضاء کې ژوند وکړي.
د کابل ښار یو اوسېدونکی وايي: « موږ دغه اقدام نېک بولو او د کورنیو چارو وزارت دغه کړنه د ستایلو وړ ګڼو، چې دوی دغه ځیرک موبایلونه ثبتوي او دا ډېر ګټور کار دی، یو خو به هغه کسان چې په ښار کې یې ناامني رامنځته کوله د دې مخنیوی وشي او بله دا چې که تاسې خپل ځیرک موبایلونه ورک کړئ، بېرته به یې ډېر ژر لاسته راوړئ.»
کورنیو چارو وزارت په پلان کې لري، په نږدې راتلونکي کې پر پلازمېنې کابل سربېره د ځیرکو مبايلونو ثبتولو پروسه نورو ولايتونو ته هم پراخه کړي.
