په داسې حال کې چې د ملګرو ملتونو په کوربتوب د افغانستان په اړه د یاد سازمان درېیمه غونډه تر ۸ ورځو وروسته په دوحه کې ترسره کېږي، ګډون کوونکې خواوې یې په اړه په کار لګیا دي او د استازو پر ورتګ پرېکړې په کې کوي.
د بهرنیو چارو وزارت درېیم سیاسي ریاست مشر ذاکر جلالي پرخپله اېکس پاڼه لیکلي، د دوحې په ناسته کې د تېرې غونډې برعکس د افغان حکومت د پلاوي د حضور لپاره شرایط ښه شوي دي.
جلالي زیاته کړې:« له لسو ورځو څخه په کمه موده کې به ولیدل شي چې د دې غونډې اړوند پرمختګونه به کوم لوري ته ځي. افغان حکومت هم د غونډې د اجنډا او ترکيب په پام کې نيولو سره د يوه پلاوي د لېږلو پرېکړه کړې. خو تر اوسه دا څرګنده نه ده، چې سرپرست حکومت به تر کومه حده په دې غونډه کې ګډون کوي. د غونډې اجنډا په ډاګه کوي، چې خبرې به د خصوصي، مالي او بانکي سکتور پر موضوعاتو او له نشه يي توکو سره د مبارزې او د بدیل معیشت په اړه متمرکزې وي. افغان حکومت له لویدیځو هېوادونو سره د رغنده تعامل پلوی دی.»
د سیاسي چارو تحلیل کوونکي وايي، سرپرست حکومت باید یو پیاوړی، ژمن او متخصص ټیم هلته ورولېږي، تر څو وضعیت ته په کتو د افغانستان واقعي استازیتوب وکولی شي.
د پوهنتون استاد ادریس ځاځی وايي:« ژمن او متخصص شخص کولی شي چې په دغه ناسته کې برخه واخلي، چې پر پټ او ښکاره رازونو باندې پوه وي. اوږدمهاله او لنډمهاله ستراتیژيو باندې پوه وي. د خپل رقیب پر نیت باندې پوه وي.»
د سیاسي چارو تحلیل کوونکی امیر ګران وايي:« زه فکر کوم په دغه کې هغه اجنډا چې اول ملګرو ملتونو په نظر کې نیولې ده، هغې ته یې بدلون ورکړی، د رسنیو راپورونو له مخې، ښځې په کې ګډون نه کوي او همدارنګه هغه اجنډا چې طالب چارواکي یې خوښوي، په کې به مطرح کېږي. لکه د نشه يي توکو کښت او د هغوی د بدیلو لارو مسایل او همدارنګه امنیتي مسایل او دغسې بانکي سیسټم، په تجارتي او له طالبانو سره پنه نړیواله کچه تعامل خبرې اترې به مطرح کېږي.»
اخوا د نړیوالو اړیکو کارپوهان بیا دې وضعیت ته په کتو وایي ،په ډېر احتمال به سرپرست حکومت یو مهم ټیم ورته ترتیب کوي او د ستونزو د حل په موخه به په دوحه کې حضور ولري.
د دوحې راتلونکې ناسته د روانې جون میاشتې پر ۳۰ نېټه پیل کېږي او دوه ورځې به دوام وکړي. اسلامي امارت هم وار له مخه د ترتیب شوې آجنډا په شتون کې د ګډون خبره تائید کړې.
