د سرپرست حکومت لوړپوړو چارواکو او پخوانيو سیاسیونو د لوی اختر په مناسبت خپلو اختریزو پیغامونو کې پر افغانانو د یووالي، نظام ملاتړ او د زده کړو پر اهمیت او اړتیا ټینګار کړی دی.
پخواني ولسمشر حامد کرزي په خپل اختریز پيغام کې چې په خواله رسنیو یې خپور کړی افغانانو ته یې د اختر مبارکي ویلې او پر سرپرست حکومت یې غږ کړی چې د هېواد آبادۍ او فلاح لپاره دې د نجونو پرمخ ښوونځي پرانیزي.
هغه زیاته کړې:« که چیرې غواړو، چې هېواد او خلک مو د پردو له احتياجه خلاص شي او د خپلو بچیانو پر مټ د بريا او پرمختګ لوړو درجو ته ورسېږي، نو اړینه ده چې د هېواد په ګوټ ګوټ کې خپلو بچیانو (نجونو او هلکانو) ته د زده کړې او تعلیم زمينه برابره کړو. بيا هم پر سرپرست حکومت غږ کوم چې د هېواد د خير او فلاح لپاره ژر تر ژره د نجونو پر مخ د ښوونځيو او پوهنتونونو دروازې پرانيزي.»
دغه راز د مخکېني حکومت د ملي روغې جوړې سترې شورا مشر ډاکټر عبدالله عبدالله په خپل اختریز پيغام کې ویلي، سږکال لوی اختر په داسې مهال راځي چې فقر، بېکارۍ او طبیعي پېښو خلک په شدید ډول اغېزمن کړي او ډېر شمېر هېوادوال له اقتصادي ننګونو سره لاس او ګریوان دي.
هغه زیاته کړې:«زموږ د هېواد ابادي او پرمختګ زموږ په یووالي، ګډ کار، د ټولو لپاره د زده کړو او کار د مشروع حق په تامین کې نغښتی دی. د افغانستان خلک باید په ځيرتیا سره د ملي ګټو، ملي یووالي، قومي، مذهبي او فرهنګي تنوع ته په احترام کولو او د ټولو لپاره د سوله ییز ژوند د زمینې په برابرولو سره، همغږي او یو موټی شي.»
له دې سربېره ګڼ شمېر اوسنیو چارواکو په خپلو اختریزو پيغامونو کې د اوسني نظام پر ملاتړ ب ټینګار کړی او ولس ته یې ډاډ ورکړی چې د اختر شپې ورځې دې په ډاډمنه امنیتي فضاء کې ولمانځي.
رئيس الوزرا محمد حسن اخند په خپل اختریز پيغام کې پر مسوولینو غږ کړی چې مسوولیتونه په سمه ادا او د خلکو خدمت وکړي.
هغه زیاته کړې:« په امارتي مسوولینو غږ کوم چې د ولس خدمت ته په پوره اخلاص او لوړ همت سره ودریږي. په هره برخه کې باید د هېوادوالو د هوساینې او پرمختګ لپاره اقدامات ترسره کړي او په دې برخه کې هېڅ نوع سستي یا غفلت ونه کړي.»
نن دوشنبه په هېواد کې د لوی اختر اوله ورځ ده.
امنیتي مسوولینو په ټول هېواد کې د لوی اختر لپاره کلک امنیتي تدابېر نیولي او هېوادوال ته ډاډ ورکوي چې پرته له اندېښنې او وېرې دې د اختر شپې ورځې په خوښۍ ولمانځي.
