ملګرو ملتونو، د بښنې نړيوالې ادارې، د ملګرو ملتونو اړوند د کډوالو نړیوال سازمان او ګڼو هېوادونو له پاکستانه د افغان کډوالو پر زوره ایستلو په اړه ژوره اندېښنه ښودلې او د اسلام اباد دغه عمل یې د کډوالو نړیوالو اصولو خلاف عمل بللی دی.
کراچۍ ښار کې د افغانستان کونسل عبدالجبار تخاري د یوې پوښتنې په ځواب کې وایي، په تېرو ۸ میاشتو کې له زرو ډېرو افغان سوداګرو او پانګه والو افغانستان ته خپله پانګه انتقال کړې او په دغه هیواد کې مېشتو افغان پانګوالو ته یې ډاډ ورکړی چې په افغانستان کې د پانګونې لپاره لازمې اسانتیاوې برابرې شوي او کولی شي په خپل هېواد کې پانګونه وکړي.
تخاري زیاتوي: « د اټکل له مخې نږدې زرو افغان سوداګرو خپله پانګه او کاروبار افغانستان ته انتقال کړی دی.»
نوموړي د کډوالو په تړاو وویل، پاکستان د هغو افغان کډوالو چې د (اې.سي. سي) یا افغان وګړو کارډ په نامه اسناد لري، هېواد ته یې بېرته ستنوي.
د هغه په خبره، د افغان کډوالو د اجباري ايستلو د دویم پړاو له پیله تراوسه ۶ سوه زره افغانان په زوره ايستل شوي دي.
تخاري وايي: « تراوسه ۴۲۵۱ افغانان چې په دې کې تر ۲۳۰پورې ښځینه او ۳۵۰ ماشومان شامل دي، دا ټول د اسلامي امارت په مصرف موږ خپل هېواد ته واستول او اوس موږ ډېر کم تر دا ۴۰ شاوخوا بندیان لرو، دا هم هغه کسان دي چې په غیر قانوني توګه نیول شوي دي او تر ۲۰ شاوخوا کسانو کارونه څېړل شوي او کېدای شي تر اختر مخکې موږ دوی خپل هېواد ته واستوو که نه شوه، نو له اختر وروسته یې بیا استوو.»
عبدالجبار تخاري د یوې پوښتنې په ځواب کې وویل،، په تېر کال کې د پاکستان له بندخونو څلور نیم زره افغان بندیان خوشې شوي او د پاکستان حکومت سره د بندیانو په راخوشې کولو بوخت دي چې د دغو هڅو په پایله کې به د لوی اختر وروسته ۲۰ تنه افغان بندیان خوشې او هېواد ته به یې را ستانه کړي.
تخاري زیاته کړې: « ډېری افغانان خپل هېواد ته واستول شول او نږدې ۶۰۰ زره افغانان وو چې په زور ویستل شوي دي؛ خو اوس افغانان په خپله خوښه ځي خپل هېواد ته، ځکه دوی اوس په دې پوه شوي دي چې پاکستان مو نه پرېږدي او ښه دا ده چې ښه په عزت خپل هېواد ته ستانه شي.»
نوموړی د دې مرکې په یوې برخه کې وایي، د کډوالو راستنېدو لپاره د امکان تر کچې چمتووالی لري او هڅه کوي چې له دوی سره د خوراکي توکو، سرپناه او جامو برخه کې همکاري وکړي.
د کډوالو په چارو کې د ملګرو ملتونو سترې کمېشنرۍ په نوي راپور کې ویلي، په ټوله کې د ۲۰۲۳ کال تر پایه د افغانستان ۹.۱۰ میلیونه وګړي بې ځایه شوې وو. د یاد بنسټ د موندنو پر اساس دغه وګړي د افغانستان په داخل او یا هم ګاونډیو هېوادونو ته بې ځایه شوي دي.
