د پکتیا ولایت لرې پرتې زرمت ولسوالۍ جغتیانو سیمه کې چې سلګونه کورنۍ په کې اوسېږي، د کلیو پراختیا ریاست په چوکاټ کې د یونېسف په مالي ملاتړ د اوبو شبکه ګټې اخیستنې ته وسپارل شوه.
سیمه ییزو مسوولین وايي، دغه ولایت کې به د مرکز ګردیز سربېره په شپږو نورو ولسوالیو کې هم د پاکو اوبو ۱۱ شبکې ژر بشپړې کړي او په خبره یې له دې سره به لرو پرتو سیمو کې پاکو اوبو ته د خلکو لاسرسی اسانه شي.
د پکتیا ولایت کلیو او پراختیا ریاست استازی راز محمد وايي:« د مرکز په ګډون په شپږو ولسوالیو کې پروژې لرو. په جاني خېلو، سید کرم، څمکني، ډنډې پټان، ګرده څېړۍ او ځاځي اریوب ولسوالیو کې یوه یوه پروژه لرو، چې انشاء الله په دې څو ورځو کې به یې کارونه پای ته ورسېږي.»
که څه هم ځايي اوسیدونکي پاکو اوبو ته د لاسرسي په برخه کې دا شبکې خورا مهمې ګڼي، خو ټینګار کوي چې د دغه ولایت په ټولو لرو پرتو سیمو کې دې خلکو ته په یاده برخه کې ګڼې پروژې پلې شي، څو د ګڼو ستونزو مخنیوی وشي.
د پکتیا یو تن اوسېدونکی وايي:« د اوبو برخه کې زموږ شاوخوا ۹۰ سلنه ستونزې حل شوې، خو ځېنې کورونه لاهم پاتې دي که چېرې دولت ورته پام وکړي.»
د پکتیا یو بل اوسېدونکی بیا وايي:« زموږ ماشومان شاوخوا ۱۰ کیلومتره تللی او اوبه به یې په لاس یا کراچۍ کې راوړلې. الحمد الله اوس زموږ ته ستونزه حل شوه.»
سیمه ییز چارواکي داسې مهال د پاکو اوبو په برخه کې د یادو شبکو پرانیسته کوي چې د دغه ولایت ډېری لرې پرتو سیمو کې لاهم زیاتې کورنۍ پاکو اوبو ته لاسرسی نه لري او خلک یې له سرپرست حکومت او همکارو بنسټونو غوښتنه کوي چې د نورو اساسي اړتیاوو د پوره کېدو سربېره دې ورته په یاده برخه کې هم ځانګړې پاملرنه وکړي.
