له تېرې یوې میاشتې راهیسې د ملګرو ملتونو پلاويو په شمول د یو شمېر هېوادونو استازي کابل ته د سفرونه په لړ کې له د اسلامي امارت له چارواکو سره د دوحې راتلونکې ناستې په اړه ليدنې کتنې کوي او په کې ګډون ته د حکومتي پلاوي هڅولو لپاره ياده ناسته د افغانستان لپاره مهمه ګڼي.
د بهرنيو چارو وزارت سرپرست مولوي امیر خان متقي په دې اړه د افغانستان لپاره د اروپايي ټولنې له ځانګړي استازي سره کتلي او ويلي يې دي، حکومت له ټولو هېوادونو سره متوازن او مثبت تعامل ته د رسېدو په هدف د دوحې په ناسته کې ماناداره ګډون ته لېواله دی.
د بهرنیو چارو وزارت د ویاند مرستیال ضیاء احمد تکل وايي: « د بهرنیو چارو وزارت سرپرست وزیر وویل ، د افغانستان اسلامي امارت پالېسي د نړي له ټولو هېوادونو سره په متوازن او مثبت بنسټ ولاړه ده او د دوحې په رېیمه ناسته کې د ماناداره ګډون غوښتونکي دي، چې پایله یې د افغان ولس او هېواد د سوکالۍ لامل شي.»
له نړيوالې ټولنې سره د افغانستان سرپرست حکومت منسجم تعامل د ملګرو ملتونو په نوښت د دوحې جوړېدونکې ناستې اصلي هدف ياد شوی او له همدې کبله د اروپايي ټولنې ځانګړي استازي توماس نيکلاسن هم په یاده ناسته کې د سرپرست حکومت پر ګډون ټينګار کړی.
خو سرپرست حکومت د دوحې راتلونکې ناستې څرنګوالی څېړي او له هغې وروسته به په کې د ګډون او نه ګډون پرېکړه وکړي.
د بهرنیو چارو وزارت د ویاند مرستیال ضیاء احمد تکل وايي: « همداراز د بهرنیو چارو وزیر په خپلو خبرو کې وویل، په کابل کې یې د ملګرو ملتونو د سر منشي له مرستیالې سره ګټورې خبرې کړي دي، نوموړي همداراز زیاته کړه چې اسلامي امارت د دوحې درېیمې ناستې څرنګوالی څېړي او په هکله به یې خپل دریځ اعلان کړي.»
د سیاسي چارو کارپوهان د دوحې راتلونکې ناسته د افغانستان د روان وضعیت لپاره مهمه بولي او زیاتوي، که سرپرست حکومت له نړیوالې ټولنې سره واقعې تعامل غواړي، نو اړتیا ده چې د دوحې ناستې په څېر له فرصتونو ګټه پورته کړي او له یوې پیاوړې اجنډا سره په کې ګډون.
د سیاسي چارو کارپوه سرور نیازی وايي: « هره هغه غونډه چې د افغانستان په تړاو جوړېږي که هغه د هېواد دننه وي او یا په نړیواله کچه وي په هغې کې د افغان حکومت د استازو ګډون اړین او حتمي دی.»
د سیاسي چارو کارپوه کمال ناصراصولي وايي: « کورنی مشروعیت نشته، بهرني مشرعیت ته د لارې هوارولو لپاره د اوسني سرپرست حکومت د دوحه درېیمه غونډه کې ګډون اړین او د افغان ولس اړتیا بولم. دا ناستې به وکولی شي چې اړیکې ښې کړي او افغانستان کې ټولو نیمګړتیاوو ته د حل لارې پيدا کولو دروازه خلاصه کړي.»
دا په داسې حال کې ده، چې د افغانستان په اړه د ملګرو ملتونو په نوښت د دوحې درېیمه مشورتي غونډه د جون په ۳۰ او د جولای په لومړۍ د قطر په پلازمېنه دوحه کې د ملګرو ملتونو د سر منشي په کوربهتوب ترسره شي.
