په داسې حال کې چې تېره اوونۍ د روسیې ولسمشر ولادیمیر پوتین اسلامي امارت د افغانستان واقعي ځواک وباله او د یاد هېواد له تور لېسته د افغان چارواکو د نومونو اېستلو موضوع يې رابرسېره کړه؛ خو اوس د روسیې دفاع وزیر اندري بیلوسوف په قزاقستان کې د ګډو ګټو هېوادونو سازمان دفاع وزیرانو ناسته کې له افغانستانه د ګواښ خبره کړې.
اندري بیلوسوف ویلي، په سیمه کې د ډلو او تروریزم د خپرېدو خطر مخ په ډېرېدو دی او په خبره یې د افغانستان وضعیت د منځنۍ اسیا د بې ثباتۍ اصلي سرچینه ده.
بیلوسوف زیاتوي: « د افغانستان وضعیت، له دې هېواد سره د تاجکستان د پولو د امنیت ټینګولو او د سیمهيیز ثبات د تامین لپاره د نورو اقداماتو اړتیا په ګوته کوي.افغانستان په منځنۍ اسیا کې د وضعیت د بې ثباتۍ اصلي سرچینه ده. یو شمېر افراطي ډلې هلته ځای پرځای شوې او په ګاونډیو هېوادونو کې یې د خپلو افکارو د ترویج لپاره هڅې ګړندۍ کړې. د سیمهيیز ثبات ډاډمنولو لپاره دوامداره څارنې او چټکو اقداماتو ته اړتیا ده.»
خو اسلامي امارت د دې اندېښنو د ردولو ترڅنګ وایي، هېچاته اجازه نه ور کول کېږي چې د افغانستان له خاورې د نورو پر ضد ګټه پورته کړي.
د اسلامي امارت ویاند ذبیح الله مجاهد وايي:« دا اندېښنه پر ځای نه ده، تاسې ګورئ چې نږدې درې کاله کېږي اسلامي امارت دلته حاکم دی او هېڅ هېواد ته له افغانستانه کومه ستونزه نه ده پېښه شوې، د امنیت او ډاډ په اړه یې ټوله نړۍ شاهده ده. بله دا چې افغانستان کې هېڅ بهرنۍ ډله او بانډ وجود نه لري او نه څوک د فعالیت اجازه لري، ځکه د افغانستان اسلامي امارت ستراتیژي دا ده چې هېڅ چا پر وړاندې د افغانستان له خاورې ګټې اخېستنې ته اجازه نه ورکوي. اسلامي امارت د افغانستان په ټوله خاوره حاکم دی؛ نو بې له کوم دلیل او شواهده د اندېښنو څرګندول بې ځایه دي او باید دا اندېښنې رفع شي، اسلامي امارت په دې اړه ډاډ ورکړی او باید باور پرې وشي.»
د روسي چارواکو وېشلي نظرونه، هغه څه دي چې د افغانستان په تړاو یې د یاد هېواد روان سیاست او اړیکې تر پوښتنو لاندې راوستي.
د روسیې دفاع وزیر د دغو څرګندونو ترڅنګ، افغانستان لپاره د روسیې ځانګړي استازي ضمیر کابلوف ویلي، د هېواد لپاره یې دا اړینه ده چې اسلامي امارت پر افغانستان قوي کنټرول ولري او د افغانستان ورانېدل یې په سیمهيیزه کچه په لوی زیان یاد کړي.
کابلوف زیاته کړې: « روسیه پر دې اند ده، چې د طالبانو لپاره دا مهمه ده څو په افغانستان کې قوي کنټرول ولري. دا زموږ لپاره بنسټیز اهمیت دی. د افغانستان هر ډول ټوټه کېدل به په ټوله سیمه کې تر ټولو منفي غبرګونونه ولري.»
د سیاسي چارو چارو شنونکی خلیل احمد نادم وايي: « د روسیې د دفاع وزیر وايي چې په افغانستان کې ترهګرې ډلې دي او دلته د افغانستان په سرحدونو کې دوی باید خپلې قواوې ځای پر ځای کړي، دا په دې مانا نه ده چې دلته رښتیا ترهګرې ډلې فعالې دي، ځکه تاسې اورېدلي طالبانو تل دا ډاډ ورکړی چې موږ نه پرېږدو چې ترهګرې ډلې دلته فعالیت وکړي او د بل چا پر وړاندې د افغانستان خاوره وکارول شي؛ خو هرومرو امریکا په دې هڅه کې ده چې څنګه د منځنۍ اسیا هېوادونه وګواښي، هلته ترهګرې ډلې واستوي او روسیه له جنجال سره مخ کړي.»
د پوهنتون استاد فیض محمد ځلاند وايي: « د روسیې د بهرنیو چارو وزارت د روسیې د پالېسۍ جوړونې او نړیوالو اړیکو مسوولین په دې باور دي چې اسلامي امارت له چارواکو سره مثبتې اړیکې باید ورغول شي، پراخه او جوړې شي؛ خو په نظامي او استخباراتي برخه کې روسیه لاهم ځېنې ستونزې د سیمې او د اسلامي امارت له اوسني وضعیت سره لري، په دې مانا چې دوی په سیمه کې وېره لري چې لاهم ترهګر ډلې ژورې رېښي لري او کولی شي د اسلامي امارت غیر رسمي موجودیت له امله پراخه شي؛ نو له همدې امله هغوی د احتیاط غوښتنه کوي.»
اسلامي امارت تل ټینګار کړی چې له ټولو هېوادونو سره د اقتصاد محوره او پر احترام ولاړو متقابلو اړیکو غوښتونکی دی او په ټينګار سره وایي چې له افغان خاورې دې هېڅوک وېره نه لري.
دا په داسې حال کې ده چې همدا تېره اوونۍ د روسیې ولسمشر ولادیمیر پوتین په افغانستان کې له اسلامي امارت سره د اړیکو د جوړولو پر اړتیا ټینګار وکړ او دا یې په ډاګه کړه چې په وینا یې طالبان په افغانستان کې واک لري او خپل هېواد کنټرولوي.
