د ۲۰۲۱ز کال په اګست کې افغانستان کې واک ته د اسلامي امارت له بیاځلې رسېدو سره سم د امریکا ولسمشر جوبایډن د دوحې هوکړې او خپلمنځيو سلامشورو پراساس، په افغانستان کې خپل ۲۰ کلن حضور ته د پای ټکی کېښود.
دې مسالې او د وتلو په وروستیو ورځو کې د افغانستان په هوايي ډګر د خلکو په ګڼه ګوڼې کې ځانمرګي برید او په کې د ۱۳ امریکايي سرتېرو وژل کېدل د امریکا کانګرس جمهوري پال غړي چې په سر کې یې د کانګرس د بهرنیو اړیکو کمېټې مشر ده د دې قضیې څېړلو ته اړ کړي.
تازه د امریکا یوې رسنۍ د دې کمېټې مشر مایکل مککال له قوله لیکلي چې له افغانستانه د امریکا د وتلو قضیې څېړلو د بایډن اداره سخته اندېښمنه کړې.
د راپور یوه برخه:« د امریکا کانګرس د بهرنیو اړیکو کمېټې مشر مایکل مککال اکسیوس ته ویلي چې هغه پر دې باوري دی چې د خروج مسالې د پلټنې قضیې د بایډن اداره کې اندېښنه زیاته کړې.»
مایکل مککال ویلي، نه پوهیږي چې د دغه قضیې پای به څه وي خو وايي ټول ښکېل کسان به ځواب ویلو ته اړ کړي ترڅو په خبره یې د ورځې په پای کې ډاډ ترلاسه کړو چې بیاځلې داسې څه نه تکراریږي.
هغه زیاته کړې:« ایا موږ به د قضیې پای ته ورسیږو؟ زه نه پوهیږم؛ خو ایا موږ به په دې قضیه کې ښکېل ټول کسان ځواب ورکولو ته اړ کړو؟ بلې. زه فکر کوم او زما اراده دا ده چې د ورځې په پای کې په دې باوري شو چې دغسې څه بیاځلې نه پېښیږي.»
د امریکا د بهرنیو اړیکو کمېټه له اوږدې مودې راهیسې له افغانستانه د امریکا د پوځي ماموریت پای په جدي توګه څېړي او تر دې دمه یې د دې هېواد هغه لوړ پوړي پوځي او ملکي چارواکي د دې کمېټې اسعماعیه ناستو او په اړه یې د پښتنو ځوابولو ته وربللې.
په دې کسانو کې افغانستان لپاره د امریکا پخوانی ځانګړی استازی زلمی خلیلزاد، د امریکا پخوانی لوی درستیز مارک میلي او د دې هېواد د مرکزي قوماندانۍ پخوانی مشر کېنټ مککېنزي شامل دي.
د سیاسي چارو یو شمېر شنونکي پر افغانستان د امریکا یرغل او بېرته په بېړه وتل یې دواړه د دې هېواد لویه تېروتنه بولي.
د امریکا کانګرس جمهوريپال غړي دغه پلټنه د بایډن ادارې پرضد د نورو قضیو په پرتله اغېزمنه بللې او وايي، سره له دې چې ډېموکراتان د دې قضیې له څېړلو سره سخت مخالف دي؛ خو وايي، دوی په دې اړه داسې شواهد موندلي چې د کانګرس دغه ډله غړي نه شي کولی سترګې پرې پټې کړي.
خو بل پلو بیا د سپینې ماڼۍ ویاند شرون یانګ له افغانستانه د امریکايي پوځیانو د اېستلو ملاتړ ترڅنګ وايي، یادې پرېکړې د امریکا پوځ ګواښونو ته د رسېدنې په برخه کې غوره موقعیت کې درولی دی.
