د امریکا او طالبانو تر منځ د سولې هوکړې له لاسلیک وروسته افغانستان کې پانګونې پراختیا ته لېواله شوي.
د افغان-امریکا د سوداګرۍ ګډې خونې مسوولین د افغان او امريکايي پانګوالو په څوارلسمه مقدماتي ناسته کې وویل ؛ د طالبانو او امریکایانو تر منځ د سولې هوکړې لاسلیک امریکايي پانګوال هڅولي چې افغانستان کې خپلې پانګونې پراخې کړي.
د شمېرو له مخې د افغانستان او امریکا سوداګریزه راکړه ورکړه په کال کې شپېتو میلیون ډالرو ته رسيږي.
د افغانستان-امریکا د سوداګرۍ ګډه خونه وايي؛ اوس تر بل هر وخت سولې ته هېله مندي ډېره شوې او ټاکل شوې په نږدې راتلونکي کې مرسته کوونکي بنسټونه او امریکايي پانګوال په افغانستان کې د پانګونې د پیل او سوداګرۍ پراختیا لپاره د افغان- امریکا څوارلسمه ناسته جوړه کړي.
د امریکا – افغان ګډې خونې مشر جیفریګریکو او د امریکا-افغان خونې اجرایوي مشر داسې وویل ((مونږ افغانستان کې د پانګونې لپاره له نورو تمویلونکو سره خبرې اترې لرو، او ټاکل شوې امریکايي شرکتونه په نږدې راتلونکي کې له افغانستان لېدنه وکړي، اوسمهال امریکايي ستر شرکتونه دلته پانګونې لري او یا هم خپل تولیدات پلوري.))
د مالوماتو له مخې د افغانستان او امریکا تر منځ د سوداګرۍ حجم شپېته مېلیون ډالرو ته رسيږي، خو افغانستان يوازې د پنځه ميلیون ډالرو په ارزښت توکي امریکا ته صادروي او پاتې پنځه پنځوس ميلیونه ډالره له یاد هېواد څخه واردات لري.
د افغانستان د سوداګرۍ او پانګونې خونې مسوولین وايي؛ امریکايي پانګوال د کانونو، کرنه، انرژۍ تولید او یو شمېر نورو برخو کې پانګونې ته لېواله دي.
یو امریکايي پانګوال چې افغانستان کې یې د مالي او بانکي خدمتونو برخه کې پانګونه کړې د سولې هوکړه د خپل کاروبار د پراختیا لپاره ښه فرصت یادوي.
د یو امريکايي مالي خدمتونو شرکت مشر مت نیسلي داسې وویل ((افغانستان کې رامنځته شوي فرصت ته ډېر خوښ یم، د امریکا او طالبانو تر منځ د سولې هوکړې وروسته په مالي سکټور کې ډېر فرصتونه رامنځته شوي زه ورته هېله من یم.))
د تاوتریخوالي د کمښت اونۍ او د سولې هوکړې لاسلیک په ورستیو کې پر اقتصاد او په ځانګړې توګه د ډالرو بیو په ټېټېدو کې مثبه اغېزه درلودلې.
