د امریکا او طالبانو تر منځ د تاوتریخوالي کمېدو د افغانانو پر ژوند مثبت اغېز کړی.
کابل ښاریان د تاوتریخوالي کموالی سولې ته د رسېدو لپاره مناسبه لار یادوي او د طالبانو او امریکا تر منځ له دې پرېکړې خوښ دي.
د کابل ښار اوسیدونکي د سولې په خبرو کې د ښکیلو غاړو پر هڅو ټینګار کوي او باور یې دا دی چې سوله یې ژوند بدلوي.
کابل ښاریان د تېرو شپږو ورځو راهیسې د نورو ورځو په توپیر د امن او ارامښت په فضا کې خپلې ورځنۍ چارې پر مخ بیایي او له ښکیلو غاړو غوښتنه کوي چې د یوې اوونۍ د تاوتریخوالي کمېدل پر دایمي اوربند او سولې بدل کړي.
د کابل ښار اوسیدونکو داسې وویل (( دا د خوښۍ ځای دی چې په تیرو څو ورځو کې جنګ او بریدونه نه دي شوي د جګړې له ښکیلو خواوو مو غوښتنه دا ده چې د دایمي اوربند او سولې لپاره سره جوړ شي،،،، دا څو ورځې موږ د ارام ساه ایستلې جنګ جګړې او بریدونه نه شته خلک خوښ دي ډير خلک تر خپلو ولایتونو لاړل هغو ځایونو ته چې مخکې نه شو تللی.))
تېره ورځ د افغانستان دفاع وزیر اسدالله خالد او افغانستان کې د بهرنیو ځواکونو قوماندان سکاټ میلر هم کابل ښار ته راوتلي وو او له ښاریانو سره یې روغبړ کړی و.
کابل ښاریان په عامه ځایونو کې د چارواکو پلي تګ د سولې د راتګ زیری یادوي او وايي هغه ژوند غواړي چې بدبختې جګړې ترې اخیستی.
تمه ده چې د روانې میاشتې په نهه ویشتمه نېټه د امریکا او طالبانو تر منځ د سولې هوکړه لاسلیک شي چې دې چارې له بلې هرې ورځ سولې ته د افغانانو هیله مندي او تلوسه زیاته کړي. کابل ښاریان پر دواړو خواوو غږ کوي چې ژر تر ژره دې په هیواد کې د دایمي سولې زیری راوړي.
