منظور پښتین یو ځل بیا پر پاکستاني ریاست توندې نیوکې وکړې.
د پښتون ژغورنې غورځنګ مشر منظور احمد پښتین چې تازه له زندانه ازاد شوی، له شمشاد ټلویزیون سره په مرکه کې پر پاکستاني حکومت نیوکې کړي چې له دوه کلونو راهیسې د پښتنو پروړاندې تاوتریخوالي ته زور ورکړی.
منظور پښتین وايي، تر هغې له خپلې مبارزې لاس نه اخلي چې د پاکستان له حکومت څخه یې د پښتنو د خوندي ژوند ضمانت نه وي اخیستی.
د پښتون ژغورنې غورځنګ مشر چې له نهه ویشت ورځو بند وروسته تیره ورځ له زندانه ازاد شو د خپلې مبارزې په دوام ټینګار کړی.
پښتین لر او بر افغانان یو تن او وجود بللی او د قام د تحفظ لپاره قرباني خپل مسوولیت ګڼي.
پښتین خبرداری ورکړی چې تر هغې به خپلې مبارزې ته دوام ورکوي چې له پاکستاني حکومت څخه یې د پښتنو د خوندي ژوند ضمانت نه وي اخیستی.
منظور پښتین داسې وویل (( له هغه مهاله چې موږ د پښتنو د حقونو لپاره مبارزه پیل کړې او د پښتنو لپاره مو د انصاف غوښتنې غږ پورته کړی د پاکستاني ریاست له لوري موږ سره تر بل هر وخت تاوتریخوالی زیات شوی دی. موږ لا کمه مبارزه کړې موږ به خپلې مبارزې ته تر هغه وخت دوام ورکړو چې پاکستاني ریاست ضمانت نه وي راکړی چې نور به د پښتون وطن څخه د جنګ میدان نه جوړوي او پښتانه به نه وژل کیږي. موږ به تر هغې مبارزه کوو تر څو چې پاکستاني ریاست د پښتون له وژلو لاس نه وي اخیستی.))
منظور احمد پښتین دتیرې جنوري میاشتې په ۲۷ نیټه د پاکستاني پولیسو له لوري ونیول شو چې نږدې یوه میاشت يې په زندان کې تیره کړه او پرله پسې ۷ محکمې بریالۍ نه شوې چې نوموړی مجرم ثابت کړی.
پښتین چې تیره ورځ له زندانه ازاد شوی خبرداری ورکړی چې لا هم د پښتنو وطن د جګړو مرکز دی او تر هغې به مبارزه کوي چې پښتون وطن یې له ظلم او بربریت نه وي ژغورلی.
