ثبات او همپالنې ټاکنیز ټيم یو ځل بیا د ټولو رایو د بیا شمیرنې غوښتنه وکړه .
ثبات او همپالنې ټاکنیز ټیم چې خپل ځان یې خپله بریالی اعلان کړی وايي، د افغانستان د سلامت او ثبات لپاره به له خپل حق هم تیر شي .
د ټیم نورو غړو بیا ګواښ وکړ چې ټاکنې یې ګټلي او په زور به د ارګ دروازې وتړي.
نن سلګونه کسانو چې په یوه غونډه کې د ثبات او همپالنې ټيم له لوري دهمه شمول حکومت په نوم له اعلان شوي موازي حکومت څخه ملاتړ وکړ.
سره له دې چې ثبات او همپالنې ټاکنیز ټیم موازي حکومت اعلان کړی او د ځینو ولایتونو لپاره یې والیان هم نومولي اوس هم په خپل دغه دریځ ډیر باوري نه دی .
د دغه ټیم مشرتابه یوځل بیا غوښتنه وکړه چې ټولې رایې دې د بهرنیانو په مخ کې یوځل بیا له سره وشمیرل شي .
د ټیم غړو همایون همایون او الله ګل مجاهد بیا ګواښ وکړ چې دوی به په خپل زور د ارګ دروازې وتړي او اجازه به ورنه کړي چې بل څوک پرې حکومت وکړي .
جالبه خو دا وه چې د غونډې ځینو ګډونوالو له عبدالله عبدالله وغوښتل چې دسولې لپاره دې له خپلې ریاست جمهورۍ تیر شي او خپل اعلان شوی همه شموله حکومت دې قرباني کړي.
خو د ثبات او همپالنې ټيم وايي چې د افغانستان د استقرار لپاره به خپل حق هم تیر شي .
شاوخوا یوه اونۍ وړاندې ټاکنو کمیسیون د ولسمشریزو ټاکنو وروستۍ پایلې اعلان کړې چې ولسمشر غني یې ګټونکی و خو ثبات او همپالنې ټیم دغه پایلې نه مني او خپل حکومت یې اعلان کړی او د لوړې مراسمو ته چمتووالی نیسي.
