افغانستان د کرونا مخنیوي په موخه له ایران سره هر ډول تګ راتګ په موقت ډول ودراوه.
دا پریکړه، د ملي امنیت شورا او وزارتونو په ګډه ناسته کې شوې ده.
ناسته کې د عامې روغتیا وزیر ویلي، تر دې دمه په افغانستان کې د کرونا ویروس هیڅ مثبته پیښه نه ده ثبت شوې او د مریضانو د تشخیص، قرنطین او تداوۍ لپاره یې په مرکز او ولایتونو کې بشپړ چمتووالی نیولی دی.
په ناسته کې پرېکړه وشوه، چې د مالیې او کورنیو چارو وزارتونه به د ماسکونو د قاچاق په مخنیوي کې خپل فعالیتونه څو برابره زیات کړي او همداراز د دولت په خزانه کې دې د احتمالي اړتیا لپاره ځانګړې بودجه ریزرف شي.
د بهرنیو چارو وزارت ته سپارښتنه وشوه، چې د ایران په اسلامي جمهوریت کې قونسلي خدمات محدود کړي او له هغه هیواده وغواړي څو، د افغانانو د ایستلو (دیپورټ) لړۍ ودروي.
دغه ناسته په داسې حال کې کیږي، چې همدا نن په هرات ولایت کې د کرونا ناروغۍ درې شکمنې پېښې ثبت شوې.
عامې روغتیا وزارت ویلي، چې دوه ښځې او یوه نارینه چې په دې وروستیو کې د ایران له قوم ښار را ګرځېدلي وو، د کرونا ناروغۍ نښې نښانې په کې لیدل شوي چې اوس په روغتون کې دي.
