هرات ولایت کې په کرونا ویروس د اخته کسانو درې مشکوکې پېښې ثبت شوي دي.
د افغانستان د عامې روغتیا وزارت وايي د هرات درې تنه اوسېدونکي چې تازه د ایران له قم ښار څخه هرات ولایت ته را ستانه شوي د کرونا ناروغي نښې نښانې په کې لیدل شوي چې د تشخیص او درملنې لپاره پلازمېنې کابل ته انتقال شوي دي.
عامې روغتیا وزارت وايي، د یادې ناروغۍ د خپریدو مخنیوي لپاره کافي وسایل په واک کې لري او د درې تنه مشکوکو کسانو نتیجه به هم ژر اعلان کړي.
وروسته له هغې چې د ایران په قم ښار کې د یاد ویروس له امله ۵ تنه مړه شول او له شلو زیات پرې اخته شول پاکستان، ایران سره خپله پوله وتړله خو تر اوسه افغانستان ایران سره خپله پوله نه ده تړلې.
بلخوا د هرات په اسلام کلا بندر کې د روغتیايي مرکز مسوول نور احمد محمدي ويلي، هلته یې ٣٦ کسان چې د ايران له قم ښار څخه هرات ولایت ته را ستانه شوي، د دوو اوونيو لپاره قرنطين کړي دي.
