امریکا او ناټو باور لري چې، د امن فضا اوونۍ به لاره هواره کړي چې، بین الافغاني خبرې پیل شي.
ولسمشر غني افغان ځواکونو ته سپارښتنه کړې چې پر طالبانو دې بریدونه بند کړي او یوازې دفاعي حالت کې دې وي.
یوناما هم په یوه خبرپاڼه کې د تاوتریخوالي کمېدو هرکلی کړی او دا یې د تلپاتې سولې لپاره یو ښه فرصت بللی.
طالبانو ویلي، د هوکړه لیک لاسلیک لپاره به مناسبه فضاء برابره کړي او د طالبانو هر برید او ډز باید سرغړونه و نه بلل شي.
(( د طالبانو بریدونه ۸۰ سلنه راکم شي، طالبان پر هېڅ ښار برید نه کوي او نه به هم د بهرنیو ځواکونو پر نظامي مرکزونو ډزې کوي. ))
طالبانو وروستۍ اعلامیه کې ویلي چې د توافقنامې د لاسلیک لپاره د مناسبې فضاء په برابرولو کې د ټولو ولایاتو مرکزونه د قول اردوګانو، فرقو، غونډونو او بهرنیوقواوو مرکزونه شامل دي. له دې علاوه، د مجاهدینو هر ډز او برید باید تخطي ونه بلل شي. ځکه دا عام اوربند نه دی.
افغانستان کې د ملګرو ملتونو سیاسي دفتر یا یوناما د امن فضا جوړېدو هرکلی کړی او دا یې د تلپاتې سولې لپاره یو ښه فرصت بللی دی.
افغانستان کې د ملګرو ملتونو سیاسي دفتر یوناما داسې ویلي (( جګړه کې ټولې ښکیلې غاړې دې د تاوتریخوالي کمولو لپاره لاس په کار شي او د دایمي اوربند او تلپاتې سیاسي ټیکاو لپاره دې لاره برابره شي.))
امریکا او ناټو هم له دغه اقدام هرکلی کړی او ویلي یې دي چې، د ملي یووالي له حکومت سره په مشوره يې مرکچيان په دوحه کې له طالبانو سره په ټول افغانستان کې د تاوتريخوالي پر پام وړ کمولو سلا شوي دي.
د امریکا د بهرنیو چارو وزیر مایک پامپیو داسې ویلي (( افغانستان کې د تلپاتې سولې یوازينۍ لاره دا ده چې افغانان په ګډه د خپل هېواد پر راتلونکې سلا شي، که څه هم ننګونې شته، خو دوحه کې شوي پرمختګونه ښه فرصت دی او افغانان باید ترې ګته پورته کړي.))
د ناتو سرمنشي، ینس ستولتنبرګ داسې ویلي (( د امن فضا اوونۍ کې د تاوتریخوالي په کمولو کې د طالبانو د چمتوالي او توان ارزونه ده او دا چې طالبان څومره په سوله او ښه نیت ښودلو کې برخه اخلي.))
په کور دننه ځینې شنونکي بیا که څه هم دا اقدام غوره ګڼي، خو وایي، باید داسې یو ادرس موجود وي چې د راکمېدونکي تاوتریخوالي ضمانت یې کړی وای.
ټاکل شوې چې اووه ورځې وروسته د امریکا او طالبانو ترمنځ د سولې هوکړه لیک لاسلیک شي او له هغې وروسته به بین الافغاني مذاکرات پیلېږي.
