افغانستان کې د ملګرو ملتونو اداره یا یوناما په څرګنده توګه د ولسمشر اشرف غني له بریالیتوب او حکومت ملاتړ نه دی کړی خو له دولتي ادارو سره د اوږه په اوږه د دریدو غږ یې کړی دی.
دغې ادارې ويلي چې د نوماندانو اندیښنو او نیوکو ته یې هم پام دی او غواړي چې له هغوی سره هم ګډ کار وکړي چې دا ستونزه حل شي.
یوناما زیاته کړې چې ولس په ډيرو سختو شرایطو کې رای ورکړې او د هغوی د رایو د وروستیو پایلو په تړاو اندیښنې باید له منځه یوړل شي.
افغانستان کې د ملګرو ملتونو اداره وايي ټولو غاړو ته په مساوي اهمیت او ارزښت قایل دي او د هر لوري د حقونو خوندیتوب ورته مهم دی.
هغوی ټاکنې ډيموکراټيکه پروسه یاده کړه او پلي کیدو ته یې خوښي وښوده.
