ولسمشر محمد اشرف غني پر خپل ټویټر لیکلي، د امریکا د بهرنیو چارو وزیر مایک پامپیو ورسره د ټیلفون پر کرښه له طالبانو سره د سولې خبرو کې د پرمختګ خبر ورکړ.
ولسمشر غني لیکلي، خوښ دی چې پامپیو ورته ټیلفون وکړ او له طالبانو سره د سولې په روانو خبرو کې یې د پرمختګ خبر ورکړ.
ولسمشر لیکلي، دا د ستاینې وړ پرمختګ دی او خوښ دی چې د سولې په اړه د دوی اصولي دریځ ګټوره پایله ورکړه او لومړنۍ موخه یې دا ده چې بې مانا وینه تویېدنه پای ته ورسېږي.
اجرایه رییس عبدالله عبدالله هم د یوې اعلامیې په خپرولو سره ویلي چې، پامپیو ورته د همدې خبرې لپاره زنګ وهلی و.
عبدالله عبدالله ویلي، پامپیو هیله څرګنده کړه چې دغه پرمختګ به د دوه اړخیزې هوکړې، بین الافغاني خبرو پیل او تلپاتي سولې ته د رسېدو لپاره زمینه برابره کړي.
له دې سره سم د نیویارک ټایمز راپور له مخې د امریکا ولسمشر، ډونالډ ټرمپ طالبانو سره د سولې تړون لاسلیک کیدلو او د امریکايي ځواکونو ایستلو ته غاړه ایښې ده.
ډونالډ ټرمپ دا شرط ایښې چې طالبان باید په دوام دار ډول د تاوتریخوالي کمیدل عملي کړي .
نیویارک ټایمز ورځپاڼې د یو شمیر افغان او امریکایي چارواکو له قوله لیکلي چې د امریکا د بهرنیو چارو وزیر، مایک پمپیو د ټرمپ د دې هوکړې په اړه افغان چارواکو سره ټلیفوني خبرې کړي دي.
