کمانډو ځواکونو بادغیس کې د طالبانو یو زندان مات کړی.
کمانډو ځواکونو په بادغیس کې د طالبانو له زندان څخه ۶۲ امنیتي او دفاعي ځواکونه ازاد کړي دي.
کمانډو ځواکونو د یاد ولایت بالامرغاب ولسوالۍ په بوکن سیمه کې ځانګړي عملیات کړي چې د طالبانو یو زندان یې مات کړی او ۶۲ سرتیري یې ازاد کړي دي.
په خوشې شویو کې ۵۵ تنه د ملي اردو، ۴ کمانډو او ۳ پولیس شامل دي.
مسوولین وايي، په دغو عملیاتو کې پنځه تنه طالبان نیول شوي او یو شمېر وژل شوي دي.
د ملي دفاع سرپرست وزیر اسدالله خالد خلکو ته د بندیانو د ازادېدو له کبله مبارکي ویلې او ډاډ یې ښودلی چې افغان ځواکونه په هر حالت کې له خاورې دفاع ته چمتو دي او په دې برخه کې قرباني ورکوي.
تازه ازاد شویو سرتیرو ویلي، دندې ته اماده دي او د وسله والو پر ضد به دندې ته وګرځي.
طالبانو په دې اړه تر اوسه څه نه دي ویلي.
