د پاکستان لومړي وزیر عمران خان ویلي، هېواد یې د ځانمرګو بریدونو له کبله په نړیواله کچه بدنام شوی دی.
عمران خان د اقتصاد نړیواله غونډه کې د خبرو په مهال ویلي، د ترهګرۍ پر ضد جګړه کې یې اویا زره وګړي وژل شوي او اوس یې پریکړه کړې چې له سولې سره به همکاري کوي او بیا به د هیڅ کومې کشالې برخه نه ګرځي.
هغه دا هم ویلي چې پاکستان د سولې د ملګرتیا پریکړه کړې او په افغان جګړه کې یې د برخې اخیستلو له کبله زیات تاوان کړی دی.
نوموړي د سویس په داووس کنفرانس کې د خپلې وینا پر مهال ویلي، د شوروي اتحاد لخوا د افغانستان له پریښودلو وروسته افراطیت، مذهبي ډلې، وسله وال ګروپونه او مخدره توکو وده وکړه چې پاکستان ته یې هم زیان ورسېد.
د پاکستان لومړي وزیر همداراز طالبانو سره د سولې هوکړه د سیمې د اقتصادي وضعیت او ثبات لپاره ګټوره ګڼلې او ویلي یي دي،هیواد یې د افغان سولې لپاره فعاله رول لوبوي او اوس په دغه هیواد کې د جګړې د پای ته رسېدو امکانات زیات دي.
هغه هیله ښودلې چې افغانستان کې سوله به پاکستان له منځنۍ اسیا سره ونښلوي.
