ولسمشر غني، د داووس اقتصادي کنفرانس په څنډه، له مطبوعاتو سره په خبرو کې وروستي پنځه کلونه له لاسته راوړ ډک وبلل.
ولسمشر غني، د داووس اقتصادي ناستې په څنډه کې تروریزم د سیمې او نړۍ لپاره ګواښ وباله او په دې برخه کې یې په ګډه همکارۍ ټینګار وکړ.
ولسمشر وویل، افغانستان په بهرنیو مرستو نه جوړیږي او باید له خپلو سرچینو ګټه واخیستل شي.
ولسمشر غني، په خپلو خبرو کې د اوبو په مدیریت ټینګار درلود او د افغانستان کانونه یې ددې هېواد سرمایه وبلله.
ولسمشر، د سولې په اړه خپلو څرګندونو کې سوله د افغانانو هیله او د افغان حکومت اساسي موخه او لومړیتوب یاد کړ.
ولسمشر غني داسې وویل (( مذاکره یوه وسیله او طریقه ده او د سوله د افغانانو غوښتنه ده. دا زما د حکومت له پيل څخه زما هدف دی. یو ملیارد ډالري پوښتنه داده، چې ایا طالبان دې ته تیار دي، چې تاوتریخوالی پریږدي؟ که دوی تیار وي، نو افغان ټولنه به دوی له ځانه سره ومني، که چرته دوی غواړي، چې افغان حکومت سقوط کړي دا د دوی ملاحظه ده، چې لري یې.))
ولسمشر غني وایي د افغانستان امنیت خوندېتوب د امریکا نه بلکې د افغانانو مسوولیت دی، چې موږ وړاندې کلونه خپل امنیت ساتلی او باید دا مسوولیت ادا کړو.
ولسمشر وویل افغانستان ګڼې اقتصادي سرچینې لري، چې افغانان ترې په اوس کې ګټه نه شي اخیستی او هڅه کوي چې دغه سرچینې د خلکو او هېواد د ګټې لپاره وکاروي.
ولسمشر دغه راز د اوبو په مدیریت هم ټینګار وکړ.
ولسمشر غني داسې وویل (( بله مهمه موضوع، د افغانستان کانونه دي، چې یوه ډیره لویه سر مایه ده. موږ ډیرې منابع لرو، خو ګټه ترې نه شو اخیستی، موږ هڅه کوو، چې دا د خپلو خلکو په ګټه وکاروو. د یو کمربند یوې لارې، په دوام بل پلان د لاجوردو دهلیز دی، چې موږ له ترکمنستان، اذربایجان او ګورجستان سره نښلوي، او دا زموږ لپاره یو لوی بریالېتوب کیدای شي.))
ولسمشر غني، په اقتصادي برخه کې د افغان حکومت لاسته راوړنې یادې کړې، چې په خبره یې د چین درې میاشتنۍ لار دریو اونیو ته رالنډه شوې او د اوبو د مدیریت په برخه کې هم د پام وړ پرمختګ شوی دی.
ولسمشر غني، دغه راز د اقتصاد نړیوال کنفرانس په څنډه کې د امریکا له ولسمشر ډونالډ ترمپ سره هم ولیدل او د افغانستان پر روان وضیعت، سولې او امنیت يې هر اړخیز بحث او خبرې وکړې.
